Микитын чонжо чон олмышто огыл. Кок тылзе эргыж деч нимогай увер уке. Таче военкоматышкат кошто.
«Чыла сай, ит ойгыро», – манын колтышт. Мо, кушто, кузежым адакат нимом ышт ойло. Мӧҥгыштыжӧ ватыжын ӱшанен вучышо шинчаж деч шылаш манын, тудат «Чыла сай, ит ойгыро» манын ойлыш да содор кудывечыш лектын кайыш, лач ушыжо веле пӧрдынак пӧрдеш, чыла илыш лончым пӱтыренак пӱтыра:
«Пала-а-а: ватыже йӱд еда омо деч посна пӧрдалеш, коклан нерым шупшмыжат шокта – шортеш. Шортеш тудо эргыж верч. Рушарня еда черке службышкат коштеш, сукен шинчынак, Юмым эргыжым аралаш сӧрвала.
Володикышт школым тунем пытарыш да вигак армийыш кайыш. Кугу да патыр туп-вачан рвезе Шем теҥызысе флотыш логале. Армий деч вара Севастополешак кодо, военный училищым тунем пытарыш. Званийжат кугеме.
Ешан-шочшанат лие. Идалыклан ик гана шочмо мӧҥгыжӧ унала коштыч. Арня еда телефон дене эре кутырышт. А кызыт теве кок тылзе лиеш – нимогай увер. Ватыжат нимомат ок пале ала ок ойло.
Ойгырашыжат такшым нимолан ок кӱл ыле да-а-а… Тыныс жап огыл шол! Сар кая.
Э-эх, Юмак веле ынде полшыжо ыле тушманым сеҥаш! Эргымат Юмак гына аралыже ыле.
Чу! А мо, мыят армийыш каем гын?! Ополченийыш! Добровольно! Кудло ий – тиде эше ерунда веле! Пенсийышкат кудло вич ияшым веле колтат да… Мый эше могай танкист лиям! Армийысе навыкем монден омыл. Конешне, кызытсе танк-влак мыйын
годсо гай огытыл, виян улыт! Ну мо вара – тунемам!
Теве шукерте огыл гына интернетыште лудым: Кадыровын салтакше-влак чылан ача-коча улыт. Нуно рвезе-шамычыштым войнаш огыт колто, шке каят, манеш, у тукымым, чечен калыкым арален кодаш, ончыкылык тукымым шуяш. А вет пеш чын ыштат!
А мемнан салтакна-влак коло-коло утла ияш-влак кредалаш каят. Тыгай самырык-влак колат. Э-эх… Кузе чот чон коршта! Молан тиде шакше фашист тӱшкам жапше годым тунам пытарен огытыл?! Молан бандер-шамычым ожно чылаштым пытарен огытыл?!
Да-а, «Белый тигр» тунам шылын! Тиде кином сниматлыше режиссёр пеш чын шижтарен! Кугу Сеҥымаш деч вара нылле визымшыште фашист танк шылын! Руш танкист Иван чын каласен: «Фашизмым сеҥыме огыл. Витле але шӱдӧ ий гыч фашизмын «Белый тигрже» садак угыч толеш да мландымбалне угыч колымашым шара». Кычал каен Иван тудым да, витне, муын огыл. Шӱдӧ ий гыч огыл, а вот шымле ий гыч толын! Да толынжо кушко? Кугу сар годым эн чот орланыше мландыш – Украиныш!
Умбакыже 15 июльышто лекше у номерыште лудса.
Дина РЫЧКОВА.
Шернур район.