Марий Эл Республикысе Молодёжный парламентын еҥже Ксения Тряпкина «Больше, чем путешествие» программыш ушнен да август мучаште «Соловки – духовное наследие России» экспедицийыш миен коштын. Российын тӱрлӧ регионжо гыч ӱдыр-рвезе-шамыч дене пырля тудо Ош теҥыз воктенысе кумдыкын моторлыкшым ужын толын.
Оренбург гыч – Марий Элыш
Ксения ПГТУ-што Управлений да право факультетыште «Кугыжаныш да муниципальный управлений» специальностьлан тунемеш.
– Оренбург ола гыч тышке тунемаш толынам. Тусо 5-ше номеран лицейым шӧртньӧ медаль дене тунем пытаренам, а руш йылме дене ЕГЭ-м 100 баллан сдатленам. Такшым изинек чолга кушкынам. 14 ийым темымеке, Оренбург областьысе тӱрлӧ йоча организацийын председательже лияш ӱшаненыт.
Школышто тунемме годым налме опытем управлений ден политике аланыште шуаралташ шӱкалтышым ыштен. Кызыт Марий Элысе Молодёжный парламентын еҥже, республикысе Кугыжаныш Погын депутатын полышкалышыже, Молодёжный избирательный комиссийын еҥже улам. Мыйым тыгак Володя Дубинин лӱмеш йоча рӱдерыште «Движение Первых» сменын координаторжылан ӱжыныт. Ӱдыр-рвезе-шамыч дене пырля смене годым лагерь кумдыкым тӱзатыме проект-влакым ямдыленна, – ойла К.Тряпкина.
Конкурслаште сеҥен
«Больше, чем путешествие» программыш ушнаш сертификатым Российысе конкурслаште сеҥымылан кучыктат. Кумда элнан кеч-могай верышкыже турым ойырен налаш йӧн пуалтеш. Сертификат почеш идалыклан ик гана путешествийыш миен толаш лиеш. Ксениян гын школ годсекак тыгай сертификатше аралалт кодын. Программе почеш тудо «Калининград театральный» турыш тылеч ончыч миен коштын. А ты гана «Соловки – духовное наследие России» турым ойырен налын.
– Соловецкий архипелаг Архангельский область ден Карелий Республик чекыште верланен. Монастырьысе ор, ожнысо лабиринт ден маяк-храм-влакым ончен коштынна, помор-шамычын тӱвырашт дене палыме лийынна. Ты шкешотан маршрут историй дене палдара, чон поянлыкым пойдара. Тыгай экспедиций деч вара эше ик гана умылет: кумда элнан историйжым палыман да тӱвыра поянлыкшым аклыман, – каласкала Ксения.
Программыш ушнышо-шамыч экспедиций годым тыгак элгӧргӧ туризмым вияҥдыме да тӱвыра поянлыкым арален кодымо шотышто опытышт дене вашла палдареныт. Участник-влак налме шинчымашыштым ончыкыжым у туристический маршрутым почмаштышт кучылт кертыт.
Студент илышыштат Ксения моткоч чолга, тӱрлӧ конкурсышто шкенжым терга. Садлан ончыкыжымат, тыгай йӧн лектеш гын, тудо «Больше, чем путешествие» программыш ушнем, манеш.
Усталык шӱлыш
Ксения усталык аланыштат шкенжым шуара. Тудо «Эстрадно-джазовый вокал» специальностьлан 9 ий тунемын. Российысе да тӱнямбал ятыр конкурслаште «Эстрадный вокал» номинацийыште сеҥен. Гитарым шокта, муро-влакым воза. Тудын йӱкшӧ регионысо педагогический отряд-влакын треклаштыже, «Навигаторы детства» ден «Движение Первых» проектлаште йоҥга.
Ӱдыр тыгак почеламут-влакым воза, прозыштат сеҥымашыже шуко. Ксения эше театральный усталык дене заниматла, ты аланыштат икмыняр конкурсышто сеҥен.
Ончыкыжым Ксения Тряпкина республикыштына у проект-влакым ямдылаш да илышыш пурташ шона. Тыге моло ӱдыр-рвезе-шамычат Российын моторлыкшо дене чакрак палыме лийын кертыт манын палдара ӱдыр.
К.Тряпкинан альбомжо гыч налме фото.