Самырык-влак тӱрлӧ аланыште пашам ыштат. Икте йочаж годымак шонен пыштыме семын школышто туныкта, весылан тӱвыра лишыл. Морко район Миклансола ялыште шочын-кушшо Надежда Михайлова медицине корным ойырен налын. Ӱдыр Йошкар-Ола воктенысе Шоя-Кузнецово интернат-пӧртыштӧ кугурак медшӱжарлан вич ий наре ышта.
Аважын темлымыж почеш
Школышто тунеммыж годым Надя туныктышо лияш шонен, марий да руш йылме урок-влак келшеныт. Кушмыж семын медицине корно тудым сымыстарен, да ӱдыр Йошкар-Оласе медколледжыш тунемаш пурен.
– Медшӱжар лияш авам темлен. Тудын ойжым колыштын, тунам чын ыштенам, шонем. Школышто сайын тунемынам, медицине алан мыланем келша, садлан студент-влак радамыш логалаш куштылго ыле. Дипломым налмеке, паша верым муашат неле лийын огыл – медшӱжар-влак эре кӱлыт. А кызыт пашам ыштем веле огыл, шке родо-тукымем да лишыл еҥем-шамычлан икымше медполышым профессионально пуэн кертам.
Практикым эртыме годым медшӱжарын пашаж дене сайынрак палыме лийынам. Терапий, неврологий, хирургий, травматологий, йоча отделений – тӱрлӧ вере практикым эртенам. Но черлыеҥ-влак чылаж годым огыл мемнам кумылын вашлийыныт: икте опытан медпашаеҥлан гына шке тазалыкшым ӱшанен гын, весе, мӧҥгешла, умылен да полшен, – каласкала Надежда.
Эше тунеммыж годымак Надежда кочажым эмлынеже улмаш, тудо рак чер дене орланен. Шоҥгыеҥ-влакым чаманен, нунылан полшаш шоненак, дипломым налше ӱдыр Шоя-Кузнецово интернат-пӧртыш пашаш толын да тусо ик отделенийыште постовой медшӱжарлан тыршаш тӱҥалын.
Эм дене веле огыл, поро мут денат
– Тӱҥалтыште йӧсӧ ыле. А ынде шке пашам путырак веле келша. Интернат-пӧртыштӧ поро кумылан еҥ-влак илат, эре таум ойлат. Нуным колыштам, кӱлеш гын, чаманенат налам. Вет южгунам поро шомакын вийже моткоч кугу. Кажне кечын пашаш нӧлталтше кумыл дене вашкем, палем: мыйым тушто вучат, аклат да пагалат. 2022 ий гыч кугурак медшӱжар должностьым ӱшаненыт. Тидын дене паша веле огыл, ответственностят ешаралтын. Но шке пашатым йӧратен ыштет гын, нимогай нелылык ок чактаре. Кабинетыште гына шинчен ом серлаге, чылажымат шотышто кучышаш улам: моло медшӱжар-влак, сиделке-шамыч кузе пашам ыштат, терген шогем, чыла вере ару лийже манын эскерем, – ойла Н.Михайлова.
Яра жапым Надежда пайдалын эртараш тырша. Концертлаш коштеш, театрыш миен толеш. Пӱртӱс лоҥгашкат лектеш, тидланже тораш кайыман огыл, шочмо ял – лач келшыше вер.
Н.Михайлован альбомжо гыч налме фото.