Марий Элысе полицийын пелияш пашажым иктешленыт. Заседанийым республикысе элгӧргӧ паша министр полиций полковник А.Вырвич эртарен.
Информационный технологий дене пайдаланымылан кӧра (1,5 пачашлан шукырак) ыштыме да экономике аланыште, тыгак наркотикым закондымын ужалыме шотышто преступлений-влак шукемыныт. Тыгодым айдемым пуштмо, тазалыклан неле эҥгекым кондымо, шолыштмо, автотранспортым шолыштмо, кугу ДТП шагалемыныт.
Элгӧргӧ паша орган-влак правам аралыше моло орган-влакын полшымышт дене 2 тӱжем наре преступленийым почыныт, нунын коклаште 750 наре преступленийже неле да посна неле радамыш пурат. Преступлений-влак кокла гыч 57,4 процентшым почыныт, тидыже ӱмашсе тыгаяк жап дене таҥастарымаште шукырак.