«Осал» кампетке

Марий Элысе 5-ше №-ан исправительный колонийын оперативный пӧлкасе пашаеҥже-влак передачылан кондымо кочкыш сатум тергыме годым ӧрыктарыше кӧргашан кампеткым муыныт.

Кодшо шуматкечын Советский районышто илыше еҥ передачым конден. Шере кочкышым тергымыж годым тыште пашам ыштыше еҥлан ӱмбал сынже келшен огыл. Кампетке вӱдылмӧ кагаз деч посна да шелше лийын. Шере кочкышым сайынрак почын ончалмеке, тушеч полимер плёнкан индеш шарикым луктыныт. Плёнко кӧргыштӧ канде порошок улмаш. Экспертизым ыштымеке, пален налыныт: канде порошок – наркотик вещества. Ты передачым кондышо пӧръеҥ шкежат ты колонийыштак срокым шуктен улмаш.