Автомашинам уло. Тудым ОСАГО ойпидыш почеш страховатлыме. ОСАГО-н вийже пытен шуктен огыл, илыме верым вашталтышым. Но тидын нерген машинам регистрироватлыме свидетельствышке вашталтышым пуртен омыл. Тиде амаллан кӧра страховой компаний ОСАГО ойпидышым ончылгоч кӱрлын кертеш мо?
Юрист Алексей Инородцев вашешта:
– Страховой компаний, страховательын (машина озан) ойпидышым ыштымыж годым шояк але тичмаш огыл информацийым пуымыжым пален налмеке, ОСАГО ойпидышым ончылгоч кӱрлын кертеш. Тыгай информаций страховой лӱдыкшын кугытшым палемдаш кӱлеш.
2002 ий 25 апрельыште лукмо «ОСАГО нерген» 40-ФЗ №-ан Федеральный законын 9-ше статьяштыже ончыктымо: автомашина (транспортный средства) дене шукырак пайдаланыме верлан машина озан паспортыштыжо возымо илыме вер але автомашинам регистрироватлыме свидетельствыштыже возымо вер шотлалтыт. Закон почеш нине верла кокла гыч кеч-кудыжо машина дене шукырак пайдаланыме верлан шотлалт кертеш. Садлан тыгай ситуаций лийме годым страховой компаний ОСАГО ойпидышым ончылгоч кӱрлын огеш керт.
Тидын нерген РФ Рӱдӧ банкын 2021 ий 23 апрельыште савыктыме посна Информационный серышыштыже возымо.