Марий Элым Вуйлатыше Юрий Зайцев Оршанке районыш мийымыж годым тулык да ача-аван попеченийже деч посна кодшо йоча-влаклан чоҥалтше пӧрт площадкыште лийын.
Марий Элым Вуйлатыше график почеш чоҥалтмым, пашан качествыжым терген. Тушто паша идалык мучаш марте шукталтшаш. Подрядчик тыгак ышташ сӧрен.
Варажым Ю.Зайцев «Безопасные качественные дороги» нацпроект почеш ачалыме Анисково – Нужавлак – Изи Кугланур кугорным аклен. Ты корно яллам райрӱдӧ дене уша, тушеч школ да рейсовый автобус-влак кудалыштыт. Пашам ончылгоч шуктымо. Чылаже 13,4 км корным ачалыме.
Вуйлатыше «Культура» нацпроект почеш капитально олмыктымо Нужавлак тӱвыра пӧртыштӧ лийын. Тыгак Шулко тӱвыра пӧртым ончалын. Тушто ик оралтыште Шулко ял шотан илем, почто, МФЦ, книгагудо, спаортзал верланеныт. Тений ты зданийым капитально олмыктымо шотышто йодмашым пуышаш улыт, проектно-сметный документаций ямде.
Районышто илыше-влак тӱвыра сферылан тӱткышым ойырымылан, корным ачалымылан Ю.Зайцевым тауштеныт.
Тыгак Вуйлатыше районышто совещанийым эртарен. Тушто Орша эҥерысе гидроузелым, Марково ялыште очистной сооруженийым, Шулко тӱвыра пӧртын леведышыжым ачалыме нерген кутыреныт. Ю.Зайцев гидротехнический сооруженийым олмыктымо пашамат ончал савырнен.
