Марий Элым Вуйлатышын кӱштымыж почеш Марий Элыште Оренбург областьыште вӱдшор деч туткарыш логалше-влаклан полыш шукталтеш.
Гуманитарный полышым политический партий-влакын регионысо да верысе пӧлкашт, калыкым социально обслуживатлыше рӱдер ден республикысе религиозный конфессий-влакын ушемышт погат. Тыгак ты пашашке республикысе бизнес-сообществе-влакын еҥыштым, предприятий ден организаций-влакым, волонтёр ден мер ушем-шамычын еҥыштым ушымо.
Лишыл жапыште верысе производитель-влак 15 тонн йӱшаш вӱдым, 3 тонн «Ника» дезинфицироватлыме средствам колтат.
Тылеч посна Марий Элын Тазалыкым аралыме министерствыже Оренбург областьысе тыгаяк министерстве деке лектын да кӱлешан эм ден медикаментым погаш тӱҥалын.
Т.Евсеев лӱмеш Национальный тоштер Орскысо краеведений тоштерын пашаеҥже-влаклан оксам поген.
Тиде поро паша умбакыже шуйна. Еҥ-влак, тыгак предприятий ден организаций-шамыч туткарыш логалше-влаклан оксам погымашке ушнен кертыт, вет тидыже РФ Президентын Юл кундем федеральный округышто полпредше Игорь Комаровын полышыж дене шукталтеш.