Ӱмаште 23 декабрьыште Уфа олаште Башкортостан Республикым Вуйлатыше Р.Хабиров Мишкан район Кугу Соказа ялын шочшыжо, Пӱрӧ олан чолга еҥже, «Аргон» предприятийым кучышо В.А.Сабировым Калык-влакын келшымаш орден дене палемден.
Пошкырт кундемыште Вячеслав Александровичым шукын палат, поро пашажым аклат. Тудо Пӱрӧ районысо марий тӱвыра автономийым вуйлатышын алмаштышыжлан, Мишкан район советын председательжылан тырша. Чолга марий еҥ шке калыкше верч тыршен пашам ышта, марий йӱла верч пеҥгыдын шога. Тыгак Пошкырт кундемыште вера шотышто комиссийын председательже.
Украиныште спецоперацийыште кредалше салтак-влаклан тудо коҥгам колта. Боец-влак шокшышто илышт, ынышт кылме манын шона. Тудын коҥгаже шуко салтаклан йӱштӧ годым ыраш, мушкылташ, кочкаш шолташ полшен. В.Сабировын чыла тиде пашажым шотыш налын, кӱкшын аклен, тыгай кугыжаныш наградым пуымо.
– Пошкырт кундемыште тыгай орденым налше марий-влак коклаште мый кумшо еҥ улам. Пашамым ӧрдыж гыч ужыныт, акым пуэныт. Спецоперацийышке коҥгам марий-влаклан веле огыл, Россий гыч улшо моло салтакланат колтена. Вет нуно чыланат элым аралат.
Шыжым нунын деке мийыме годым ныл вере пурен лектынна. 30 фуро гуманитарный грузым наҥгаенна. Тушто салтак-влакын кузе илымыштым шке ужын толынам. Марий-влак ятырын улыт. Эсогыл пырля тунемше кок йолташ рвезын эргыштымат ужынам.
Южгунам боец-влак шкеак мый дечем йодыт: «Кылмена, коҥга кӱлеш». Тунам, тӱрлӧ йӧным кычалын, нунылан коҥгам колтем. Ончыкылан ты пашам кумдаҥдаш шонем, – мане В.А.Сабиров.
Вячеслав Александровичым орденым налмыж дене шокшын саламлена, тӱвыргӧ паша лектышым тыланена.
