Абитуриент-влак тунемаш пурымо шотышто йодмашым «Поступление в вуз онлайн» суперсервис гоч пуэн кертыт. Тудо 20 июнь гыч шке пашажым тӱҥалын. Выпускник-влак Российысе кугыжаныш вузлашке да нунын филиалышкышт документым дистанционно колтен сеҥат. Документым колтымо жап гыч вузыш пурен кертме марте могай паша ышталтмым сервис гоч эскераш йӧнан.
Тений сервис гоч 900 наре тунемме тӧнеж, тыгак частный вуз-влак (бюджет верыш) бакалавриат да специалитет программе дене очно да заочно тунемаш пураш документым погат. Ончыч сервис гоч бюджет верыш веле документым колташ лийын гын, тений оксам тӱлен тунемаш шонышо, льгото дене пайдаланыше, целевой направлениян-влакат пайдаланен кертыт.
Абитуриент-влак тунемаш пурымо шотышто конкурсын кузе эртымыжым шкеак эскерат. Тудыжо кажне кечын уэмдалтеш. Тидыже икмыняр специальность да направлений дене документым колтышо абитуриент-влаклан сай йӧным ышта.
Тыгай сервис дене пайдаланаш манын, Госуслуги порталыште абитуриентлан учётный записьым пеҥгыдемдыман. Тыге тудо, шкаланже келшыше вузым, направленийым ойырен, приёмный комиссийыш йодмашым возен колтен кертеш. Тыгак вступительный экзаменыш возалташ, документым обрабатыватлыме статусым эскераш, экзаменын результатшым ончаш, тунемаш пурен кертмым эскераш лиеш.
Ты сервис 2020 ий кеҥеж годсек пашам ышта. Кодшо ийын 44,5 тӱжем абитуриент тудын дене пайдаланен.