Оршанке районышто илыше 36 ияш ӱдырамаш 55 тӱжем наре теҥгелан ондалалтын.
Тудлан ик мессенджерышкыже палыме еҥын лӱмжӧ дене файлым колтеныт да «Видеошто тый улат мо?» манын йодын возеныт. Ӱдырамаш файлым телефонышкыжо вераҥден, тыге мошенник-влак приложенийже да счётшо дене пайдаланен кертыныт. Тылеч вара телефон оза 55 тӱжем наре теҥге деч посна кодын.
Полиций пашаеҥ-влакын рашемдымышт почеш, ӱдырамашлан шпионский программым колтеныт. Ты программын телефоныш логалмеке, мошенник-влак гаджетысе приложений дене пайдаланен да смс дене толшо код-влакым пален налын кертыт.