Шкем оксам айда-лийже кучылтмо, мошенник-влак деч аралаш ынде куштылгырак. Онлайн-банкыште операций-влакым ышташ чаракым шындаш лиеш. Ойырен налаш йӧн уло: могай услуго дене дистанционно пайдаланаш, а мом йӧршеш чараш. Тидын нерген Россий банкын Марий Эл Республикысе отделенийже умылтара:
Теве могай чаракым шындаш лиеш:
— онлайн-кредитым оформитлаш. Тудым шындымеке, мошенник-влак тендан лӱмеш онлайн-кредитым налын огыт керт. А шкаланда онлайн-кредит кӱлеш лиеш гын, чаракым кеч-могай жапыште кораҥден кертыда. Кредитым налмеке, уэш ограниченийым пурташ лиеш;
— ик онлайн-операцийым ышташ эн кугу окса кугытым палемдаш. Мутлан, 10 тӱжем теҥге деч утла огыл манын шындаш гын, карте мошенник кидыш логалеш гынат, тиддеч утларак оксам кучылт але сниматлен огеш керт. Банкыш каен, могай лимит улмым пален налза: суткалан, тылзылан, интернет-кевытыште сатум налмылан да молат;
— чыла тӱрлӧ банковский онлайн-услуго деч кораҥаш лиеш.
Чаракым кузе шындаш?
Южо банкын онлайн-приложенийыштыжак тидым ышташ лиеш, а южо банкыште, офисыш миен, йодмашым возыман. Садлан ты йодышым банкыш каен рашемдыман. Чаракым кеч-могай жапыште кораҥдаш але параметржым вашталташ лиеш.
НО! Чарак-влакым пуртымекат, тӱткышым ида йомдаре, личный да платёжный данный-влакым иктыланат ида ойло.