Лач тыге тачысе геройна нерген ойлаш лиеш. Кок ий наре тудо тортым кӱэштын, а ынде лу ий полицийыште пашам ышта.
Сергей Шакиров Йошкар-Олаште шочын-кушкын, 28-ше №-ан школышто тунемын. Полиций паша дене илышым кылдаш нигунам шонен огыл. Школ деч вара «Повар-кондитер» специальностьым налын, торт-влакым кӱэштын.
Вара армийыш каен. Угарман кундемысе Богородск олаште Россий МВД-н элгӧргӧ войскаштыже кок ий службым эртен.
Сергей шочмо кундемышкыже пӧртылын, ешаҥын.
– Паша вер лийын огыл, сандене икмыняр ий Москошко пашаш кошташ логалын, но тӱрлӧ амаллан кӧра уэш Йошкар-Олаште паша верм кычалаш тӱҥальым. Шуко шоныде, МВД-н кадр пӧлкашкыже йодмашым возшым. Тушто «медвытрезвительыш» колтена манын ойленыт. Чыла анализым погымеке, таза улат, икымше группыш пурем манын каласеныт. Вара патрульно-постовой службыш кусареныт. Тыге 2009 ий годсек тушто пашам ыштем. Лу ий жапыште тӱрлыжат лийын, шолыштшымат кученна, командировкышкат коштынна, – ойлыш С.Шакиров.
Сергей Озаҥ олаште эртаралтше Универсиадыште мероприятийыште, 2015 ийыште Сочисе Олимпиадыште пашам ыштен.
– Кеч пашалан кӧра тыгай мероприятийлаште лиш йӧн лекмылан пеш куанем. Молышт нине событийым телевизор дене гына онченыт гын, мый шке тушто лийынам. Тидыже мылам изи огыл опыт. Моло олаласе пашаеҥ-влак дене палыме лийынна, ваш-ваш паша опытна дене палдаренна,– каласкалыш Сергей.
– Яра жапда улмо годым мом ыштеда?
– Пашам кок кече коден ыштем, сандене яра жап лийме годым эргым дене жапым эртараш тыршем, спорт дене заниматлем, спортзалыш коштам. Эргымым спортлан кумылаҥдем. Каныш кечылаште ача-авам деке миен коштына. Тыгак юридический кӱшыл шинчымашым налам, тидланат жапым ойыраш тыршем , – каласыш С.Шакиров.
Сергей Шакиров ик профессий гыч йӧршын вес профессийыш лупшалтын, но тиде ошкылым ыштымыжлан тудо нимынярат огеш ӧкынӧ. Пашаже келша, калыклан полша, а тиде эн кӱлешан.
Фотом еш альбом гыч налме.