Сентябрьыште «Российын ӱшанже: эн чапле спорт школ» национальный спорт премийын регионысо йыжыҥже лийын. Тушто ешартыш шинчымашым пуышо спорт школ-влак таҥасеныт. Икымше вер дене Марий Элысе «Виктория» олимпийский резерв спорт школ суапландаралтын.
Ты школышто спортсмен-влаклан ешартыш шинчымашым ече дене куржталмаште, спортивный туризмыште, биатлонышто, пуля дене лӱйкалымаште лӱмын келыштарыме программе почеш пуат. Занятий-влак кок йыжыҥ дене эртат. Икымшыже тӱҥалше спортсмен-шамычлан келыштаралтын, кокымшыжо – профессионал-влаклан. Тачысе кечылан школышто 484 спортсмен бюджет кӱшеш тунемеш. Тушечын ече дене куржталмаште спорт мастерыш 7 кандидат, 5 спорт мастер, биатлонышто спорт мастерыш 2 кандидат, спортивный туризмыште 12 спорт мастер да спорт мастерыш 16 кандидат улыт.
Кундемыштына ече спортымат вияҥдымылан кугу тӱткыш ойыралтеш. 2018 ийыште регионысо ече-роллер трассым олмыктеныт. Тидыже мемнан дене регион да Россий кӱкшытыштӧ тӱрлӧ спорт таҥасымашым эртараш, спортсмен-влакын мастарлыкыштым кеч-могай пагытыште шуараш йӧным ышта. Ты школын базыштыже спортивный туризмын ече дене куржталме дистанцийыштыже кажне ийын Российын первенствыже эртаралтеш.
«Виктория» школын спортсменже-влак Россий кӱкшытан тӱрлӧ таҥасымашке чӱчкыдын ушнат да сай результатым ончыктат. «Российын чемпионжо» да «тӱнямбал чемпион» лӱмым спортивный туризм дисциплиныште шуаралтше спортсмен-влак эреак налыт. Элыштына спортын ты видыштыже Марий Элын командыже икымше верыште кая.