Инвалид-влак коклаште эртаралтше «Абилимпикс» чемпионатын республикыштына сай кӱкшытыш шумыжо, Российысе рейтингыште 9-ше верым айлымыже путырак куандара.
Тыгай чемпионатым эн ончыч Японийыште 1970-ше ийлаште эртараш тӱҥалыныт. Тушко Россий 2015 ийыште ушнен, а Марий Эл – 2017 ийыште. Ты жапыште республикыштына 300 утла еҥ призёр лийын, 35 еҥ национальный чемпионатышке ушнен.
Тений регионысо чемпионат икмыняр тунемме тӧнежыште эртаралтын. Рӱдӧ верже – Марий политехнический техникум. Чемпионатыште тӱрлӧ мер организаций гыч 66 еҥ, 85 студент, 66 тунемше таҥасеныт. Ончычсо семынак нуно «Тунемше», «Студент» да «Специалист» категорий-шамычлан шелалтыныт.
Чылаже 27 компетенций уло, тышеч коктыж дене – «Банковское дело» ден «Лоскутное шитье» – участник-шамыч икымше гана шке моштымашыштым ончыктеныт.
Тыгак тений интернат-пӧртлаште илыше I да II группо инвалид-влаклан «Возможности» фестиваль икымше гана лийын. Тудым «Фестиваль возможности» маныныт. Республикысе тыгай тӧнежлаште илыше 23 конкурсант Звенигово район Красногорский интернат-пӧртыштӧ шке мастарлыкыштым кум компетенцийыште терген. Нуно кыстыбайым ямдыленыт, меж гыч картиным ыштеныт да артист койышым ончыктеныт.