Выпускник-влак школ илыш дене чеверласа да, кумда илыш корныш лектын, йомартле студент пагытыш кусна. 22 майыште Йошкар-Оласе 14-ше №-ан гимназийыштат пытартыш йыҥгыр лие.
Тушто кызыт 1505 икшыве шинчымашым налеш. Тений 51 выпускник 11-ше классым, 125 тунемше 9-ше классым тунем пытареныт. Нунын радамыште Степан Голчин ден Дмитрий Беляев улыт.
Ты весела, тыгодым изиш шӱлыкан пайремыш выпускник, туныктышо, ача-ава-влак погыненыт. Йошкар-Олаште шочын-кушшо, ик классыште тунемше Степан ден Дмитрий 11-ше классым тунем пытареныт. Нунылан ты гимназий келге шинчымашым пуэн, сандене тудым коден каяш изиш йӧсырак. Рвезе-влаклан тунеммаш эре икымше верыште лийын. Тидлан шуко жапым ойыреныт, шонымашке шуаш тыршеныт. Коктынат илышыштым программист профессий дене кылдаш шонат. Поснак физикым келгын тунемыныт.
Степанын аваже – Чуваший кундемын шочшыжо, ачаже – Киров кундем гыч. Рвезын йоча пагытше Йошкар-Олаште эртен. Рвезе пушкыдо, поро кумылжо дене поснак ойыртемалтеш. Кугыеҥ-влакым пагала, изиракым чамана. Туныктышын кӱштымыжым эре шукташ тыршен, мӧҥгӧ пашам ыштыде, школышко ик ганат толын огыл. Моткоч ответственный, ушан-шотан, мутым колыштшо, дисциплиным шотыш налше рвезе.
Cтепан Волгатехыш тунемаш пураш ямдылалтеш. Тений тудо физике дене проект пашам аралымыж дене ты вузышто кокымшо верым налын. Ты сеҥымаш рвезылан тунемаш пураш эше вич баллым ешарен.
– Ты гимназийыште тунеммемлан тачат куанем. Тыште опытан туныктышо-влак тыршат. Чылаштым моткоч пагалем. Школ дене чеверласымылан изиш чонемлан неле. Вашке математике, руш йылме да физике дене ЕГЭ-м кучаш тӱҥалам. Тидлан идалык ямдылалтынам, шуко тунемынам. Сандене гимназийыште спорт таҥасымашыш, тӱвыра мероприятийыш ушнаш жапем пешыже лийын огыл, – мане С.Голчин.
Дмитрий – Степан семынак ушан-шотан рвезе. Тудо ондак Йошкар-Оласе 13-шо №-ан школышто тунемын. Гимназийыш 6-шо классыште куснен. Ты тунемме вер тудлан йӧратыме лийын шуктен. Гимназий, туныктышо-влак нерген шуко поро мутым ойлыш.
– Гимназийыште тунемаш келшен. Тыште мероприятийым шуко эртарат, да тыгодым туныктышо-влак сай шинчымашым пуат. Ударник улам. 10-11-ше класслаште руш йылме, математике да физике дене школысо олимпиадылаште шкем тергенам. ЕГЭ-м нине предметла дене кучаш тӱҥалам. ПГТУ-шко программистлан тунемаш пураш шонем. Вет ты профессийым йоча жап годсек ойырен налаш шоненам. Яра жап годым велосипед дене кудалыштам, – ойлыш Д.Беляев.
Экзамен тургым выпускник-влакым изиш тургыжландара гынат, нуно сайлан гына ӱшанат, шуко баллым погаш шонат. Сандене тиде кок рвезылан да чыла выпускниклан шонымашке шуаш, ончыко каяш гына тыланена!