«Единый Россий» партий РФ Кугыжаныш Думыш депутатлан кандидат-влакым ойырымо шот дене 24-30 майыште ончылгоч йӱклымашым эртара. Тиде жапыште регистрацийым эртыше кандидат-влак кокла гыч кӧ эн шуко йӱкым пога, тудо шыжым эртышаш сайлымашке ушнен кертеш. Республикысе Кугыжаныш Погынышкат кок еҥ, Йошкар-Оласе кок округышто тений депутат-влак тыге ешаралт сайлалтыт.
Кызыт кандидат семын регистрироватлалтше еҥ коклаште шукынжо политике корнышто икымше ошкылым ыштыше-влак улыт: мер паша дене кылдалтше, волонтёр-влак да молат, палемдышт «Единый Россий» партийын марий кундемысе пöлкаштыже журналист-влаклан брифингым эртарыме годым. Тушто куд кандидат лийын. Тышеч нылытше — палыме марий чолгаеҥ.
Республикысе кандидат-влак дене https://pg.er.ru/candidates сайтыште палдарыме.
Ончылгоч йӱклымашке ушнышо кандидат-влак районлашкат лектын коштыт. Е.Кузьмин тиде кечылаште Морко районышто (снимкыште), У Торъял кундемыште калык дене вашлийын.
КУЗЕ ЙӰКЛЫМАН?
Келшыше еҥ верч «Госуслуги» портал гоч электрон йӧн дене йӱклыман. Тушто ончылгоч авторизацийым эрташ кӱлеш. Йӱклымашке сайлыше семын регистрацийым эртыше кажне еҥ ушнен кертеш.
Ончылгоч йӱклымаште чылалан икгай йӧн пуалтын. Кӧ калык дене утларак
пашам ышта, тудак шукырак йӱкым поген сеҥа. Ойырымо годым иканаште икмыняр кандидатлан йӱкым пуаш лиеш.
Марий Элыште ончылгоч йӱклымаште 35 кандидат регистрацийым эртен.
Тышеч 23 еҥ «Единый Россий» партийыште шога,
11 – беспартийный,
1 – партийлан мелын шогышо (сторонник).