Мордовийысе Большеберезниковский районышто «Лӱдыкшыдымылык школ» таҥасымаш эртен. Марий Эл гыч тушко кок команде миен коштын.
Ӱдыр-рвезе-влак комбинированный пожар эстафетыште, 1 меҥге кужытан кроссышто куржыныт, ӱнарым йодшо комплексный упражненийым ыштеныт, акваторийыште кычалме да утарыме пашам шуктеныт, чарак полосам эртеныт да шуко моло видыште таҥасеныт. Тыгак «Стенгазета» ден «Визитная карточка» конкурслашке ушненыт.
Иктешлыме почеш, Марий Элын кок командыжге сеҥышыш лектын. Нуным «Роза ветров» йоча да самырык-влакын рӱдерыштышт наградитленыт. 1-10 августышто Москошто таҥасымашын Российысе йыжыҥже лиеш. Тушко Марий Эл гыч сеҥыше-влак каят.
