Марий Элыште «Билет в будущее» проектым 2025 ийыште илышыш шыҥдарыме шотышто иктешлымашым ыштеныт.
6-11-ше класслаште тунемше ӱдыр-рвезе-шамычлан келыштаралтше ты проект республикыште 2020 ий годсек илышыш пурталтеш. Тиде – «Молодёжь и дети» нацпроектын «Профессионалитет» федеральный проектшын ужашыже.
Ӱмаште «Билет в будущее» проектыш Марий Элысе 143 туныктымо тӧнеж гыч 18 354 школьник ушнен. Нунын кокла гыч южыжо республикысе колледж ден техникумлаште эртаралтше профессиональный пробышто лийыныт, регионысо предприятий ден организацийлашке профориентационный экскурсий дене миен коштыныт да кызытсе жаплан келыштарыме производствым ончал савырненыт.
Ӱдыр-рвезе-влак ты проектыш ушнышо МарГУ ден ПГТУ-што эртаралтше почмо омса кечылаште, туныктымо лабораторийлаште экскурсий дене лийыныт.
Теният проект почеш ятыр ышталтшаш. Тушко утларак туныктымо тӧнеж-влакым ушаш палемдыме. Профмероприятийлаш шукырак школьникым лукташ шонат, тидлан пашам пуышо предприятийламат шукырак авалташ шонымаш уло. Тыгак – «Россия – мои горизонты» урок деч варасе паша курсыш регионысо компонентым пурташ да вияҥдаш.
Марий Элысе Образований да науко министерствын ВК-се тӱшкаж гыч налме фото.