Ончыкылыкна – ӱшанле кидыште

24 январьыште Йошкар-Оласе самырык-влакын полатыштышт Оборонно-массовый да военно-патриотический паша шотышто республикысе месячникым почыныт. 23 февраль марте Марий Элысе олалаште да районлаште месячниклан келыштаралтше тӱрлӧ мероприятийым эртарат.

Тений месячник Сталинград кредалмаште фашист войскам кырен шалатымылан, тыгак Курск воктене тушманым сеҥымылан, Ольга Тихомирован подвигым ыштыме кечыжлан 80 ий теммылан пӧлеклалтын.

Месячникым торжественно почмашке республикысе олала да районла гыч кадет ден юнармеец-шамыч толыныт. Самырык-влакын полатыштышт нуно «10 граней патриотизма» темылан келыштарыме тӱрлӧ площадкыште лийыныт. Ончерлаште тӱрлӧ спецвойскаште кучылтмо военный да специализированный техникым, стрелковый вооруженийым да экипировкым онченыт. Кечывал деч вара месячникым торжественно почыныт, тушко Марий Элым Вуйлатыше Ю.Зайцеват ушнен. «Шочмо элым аралыше-влакын кечышт вашеш тыгай сынан мероприятийым эртарымым поснак кӱлешанлан шотлем. Вет тудын тӱҥ шонымашыже – Шочмо элым йӧратыше тукымым кушташ», – ойлен Ю.Зайцев.

Карина Молодецких Морко район Кокласола лицейыште 9-ше предпрофильный кадет классыште тунемеш, вес ийын кадет классыш вонча.

Кокласола лицейысе кадет классыш тунемаш каяш авам темлен. Тиде направлений иканаште келшен манын ом керт, тидлан жап кӱлын, а кызыт авамлан тауштем гына. Лицейыште урок-влак пытымеке, изиш каналтена да тӱрлӧ предмет дене факультативыште шинчымашнам келгемдена, поснак – обществознаний ден историй дене. Военный службын негызше урокыш куанен коштына. Шке профиль дене районысо да республикысе тӱрлӧ мероприятийыш ушнена, – ойла К.Молодецких.

Кок ий ончыч Карина ешыж дене Кугу Шале ял гыч Йошкар-Олаш илаш куснен гынат, ӱдыр лицейыштак тунемаш кодын. Вет тушто тудын ятыр йолташыже, йӧратыме туныктышыжо-влак улыт. Шочмын эрдене ӱдыр Кокласолаш кудалеш, арня мучко тӱшкагудышто ила, а каныш кечылан Йошкар-Олаш пӧртылеш. 11-ше класс деч вара К.Молодецких Россий МВД-н Угарман оласе академийышкыже тунемаш пурынеже, следователь лияш шона. Тидлан кызытак ямдылалтеш, тӱрлӧ книгам лудеш, тудлан детектив утларак келша.

Валерий Александрович Подбойкин Кокласола лицейыште ОБЖ урокым вӱда, тыгак лицейысе «Поиск» военно-патриотический клубым да Боевой чап тоштерым вуйлата:

Тиде тылзын Совет да Россий армий-влакын историйыштым шымлыме дене кылдалтше ятыр мероприятий лиеш, конкурс-влакым эртарена. Икымше арнянак шуко паша ышталтшаш: таза илыш-йӱлам кучымылан пӧлеклалтше мероприятий, мини-футбол, волейбол, теннис, ече дене таҥасымаш-влак, автоматым рончен погымаш, икымше полышым пуымаште шкем тергымаш да молат. Сар дене кылдалтше почеламутым сылнын лудмо, сочиненийым возымо, патриотизм шӱлышан мурым мурымо, тыгак боевой листовко ден пырдыжгазет-влакым ямдылыме конкурс-влакым эртарена. Иктешлымашым 25 февральыште ыштена, сеҥыше-шамычым палемдена.

Тунемше-влак тӱрлӧ шымлыме сомылым ыштат, кажне тунемшын – шке проектше. Районышко веле огыл, вес районышкат экскурсионный паша дене лектын коштына. Юнармий радамыш у тунемше-влакым пуртена. Общественный пашамат шуктена. Мутлан, «Обелиск дек корно» акцийлан келшышын, тунемше-влак памятник дек корным эрыктат, пайремлан пеледыш аршашым намиен пыштат. Илалше-влаклан полшат. Лицей пелен «Поиск» военно-патриотический клуб ятыр ий пашам ышта, официальный статусым шым ий ончыч налынна. Лицейыште тоштер уло, тудым шукерте огыл уэмдыме, у витриным, оборудованийым наледыме.

Кокласола лицейын эше ик тунемшыже – Костя Никифоров.

Тудо 10-шо кадет классыште тунемеш. Рвезе юнармий радамыш пурен, волонтёр пашам шукта. Костян йӧратыме урокшо – физкультур, поснак ече дене кошташ келша. Таҥасымашкат уло кумылын ушна. Урок-влак деч вара жапым пайдалын эртара: теннис, волейбол дене модеш. Школым тунем пытарымеке, К.Никифоров Россий МВД-н Волгоград оласе академийышкыже тунемаш пурынеже.