«Ямде лий» газет редакций «Рвезе йӱк» конкурсым иктешлен да 2021 ийыште ойыртемалтше-влакым лауреат лӱм дене палемден. Ты пашам илышыш шыҥдараш «Ший памаш» сылнымут фонд (вуйлатыше – писатель В.Краснов) полшен.
Журналистикыште ойыртемалтмылан «Ямде лий» газетын икымше редакторжо З.Е.Яковлева лӱмеш премий дене 1-ше номеран Шернур школын тунемшыже Дмитрий Веденькин палемдалтын.
Кужэҥер район Шӱдымарий гыч Аня Андреева поэзийлан шӱман. Тудлан Антонов Ивук лӱмеш премийым кучыктымо.
Волжский район Сотнур школын «Русская словесность» кружокшылан (вуйлатыше – Э.А.Егорова) В.Б.Исенеков лӱмеш премийым пуымо.
«Почётан юнкор» лӱм дене Волжский район Пӧтъял школын кугурак вожатыйже, туныктышо-организаторжо Л.В.Кошаева палемдалтын.
2-шо лаштыклан увер-влакым (50 (1667) No • 2021 ий 10 декабрь) И.Александрова, Е.Иванова, Э.Терентьева, И.Ямбаршева ямдыленыт.