Марий Элыште 2-10 мартыште «Профессионалы» профессиональный мастарлык шотышто Российысе чемпионатын регионысо этапше эртаралтеш. Тудым 3 мартыште Марий радиомеханический техникумышто официально почыныт.
Россий Федераций просвещений министр С.Кравцов участник-влаклан кумылым нӧлтышӧ видеобращенийым колтен. Марий Эл Правительстве председательын алмаштышыже К.Иванов, Марий Элын образований да науко министрже Л.Ревуцкая чемпионатын кӱлешлыкшым палемденыт, чыла участниклан мастарлыкыштым сайын ончыкташ темленыт.
Тений мастарлык чемпионатыште кыдалаш профессиональный образованийым налше 275 студент да школлаште тунемше 32 йоча моштымашыштым тергат. Таҥасымаш 50 компетенцийыште эрта, а «Юниор» категорийыште – 6 компетенцийыште.
«Профессионалы» чемпионат кажне самырык еҥлан моткоч кӱлешан. Ӱдыр-рвезе-влак, тушто участвоватлен, паша профессийын престижшым нӧлтат, профессионально кушкыт. Конкурс заданий-влакым ямдылымашке тӱрлӧ предприятий-партнёрын еҥже-влак ушненыт. Садлан тиде чемпионатыште шкеныштым эн чолган ончыктышо участник-влак ончыкшым, предприятийлаште стажировкым эртен, паша опытым поген кертыт. Тений Марий Элысе 76 предприятий уста конкурсант-влаклан стажировкым эрташ 230 верым пуа.
Саман дене тӧр
Йошкар-Оласе строительный техникумын инициативыж почеш, «Профессионалы» чемпионатыште «Бережливое производство» у компетенций лектын. Кызытсе саманлан келшыше инженерный компетенций почеш участник-влак сантехоборудованийым погымаште мастарлыкыштым ончыктат.
Эше ик у компетенций – оптоэлектронике. Конкурсант-влак оптоэлектронный системым проектироватлаш, тӱрлӧ технологийым, оптоэлектронный прибор ден устройствым кучылтын, оптоэлектронный системым ыштымаште моштымыштым ончыкташ тӱҥалыт.
Кызытсе саман дене тӧр кайыман. Илышнам компьютер деч посна ынде огына уж. Ятыр пашам айдеме огыл, а компьютер, робот ыштат. Чемпионатын у компетенцийже – «Агроботы» але «Агророботы». Йошкар-Оласе аграрный колледжыште участник-влак пасу пашам куштылемдаш полшышо робот-влакым проектироватлаш да программироватлаш тӱҥалыт.
Таҥасыме деч посна участник-влак «Синхронизация рынка труда и системы образования» теме дене пленарный заседанийыште, тыгак тӱрлӧ паша, экономике йодыш дене кылдалтше «йыргешке ӱстелыште», дискуссийыште, мастер-классыште участвоватлат.
Повар да кондитер
Ӱдыр-рвезе-влак чылан чолга, писе, шке пашам чон йӱлен ыштыше улыт. Теве, мутлан, Волжск ола гыч толшо Любовь Храмченко «Кондитерское дело» компетенцийыште мастарлыкшым ончыкта. Тудо Волжскысо Строительно-промышленный колледжыште кокымшо курсышто поварлан тунемеш. «Икымше гана тыгай чемпионатыш ушненам. Кочкаш шолташ изинек йӧратем. Но чонем кондитер пашалан утларак шӱман. Шонем, конкурсышто шкемым сайын ончыктем», – ойла Люба.
Беларус йолташна-влак дене пырля
Тений Марий Элысе чемпионатыш Беларусь Республик гыч уна-влак: эксперт Александр Андреевич Гомелев ден «Вальщик леса» компетенций дене участник Николай Габлеев – толыныт.
«Полоцк оласе кугыжаныш чодыра колледжын кумшо курсын студентше улам. Александр Андреевич – туныктышем. Тыгай чемпионатыште участвоватлыме опытем уло. Ӱмаште, мутлан, Брянск областьыште «Кубок чемпионов Союзного государства» турнирыште лийынам. Тушто пушеҥгым йӧрыктымӧ номинацийыште юниор-влак коклаште кумшо верым сеҥен налынам ыле. Марий Элыште икымше гана улына. Тыште калык поснак порыла чучеш. Сайын вашлийыныт. Йошкар-Ола келшен. Марий йылмыда сылне. Конкурс эртыме жапыште, ӱшанена, марий тӱвыра дене палыме лияш йӧн лектеш», – манеш Н.Габлеев.
Тамле шашлыкым ышта
Маргарита Чумукова «Поварское дело» компетенцийыште вийжым кокымшо ий терга. Ӱмаште ӱдыр кокымшо верым сеҥен налын ыле. Тений икымше лияш тырша. Тудо Звенигово оласе транспортно-энергетический техникумышто кокымшо курсышто тунемеш. Эн чот тамлын шашлыкым ыштен моштем, манеш.
– Тений ӱмашсе дене таҥастарымаште конкурсын этапше-влак нелырак, но оҥай улыт. Кум кече жапыште повар мастарлыкнам ончыктена. Икымше кечын кол шӱрым, расстегай когыльым, шокшо кочкышым, «мимозо» салатым ыштена. Мыланем тиде этап эн неле, молан манаш гын кол кочкышым шагал годым ямдылем. Кокымшо кечын панкейкым, бургерым, тапасым ыштена. Тапас – тиде изи закуско-влак. Кумшо кечын ушкал шыл гыч шокшо кочкышым ямдылена, кол гыч руашан кочкышым да шере тартым (почмо когыльым) кӱктена – палдарыш Рита.
Чемпионат республикысе тӱрлӧ площадкыште – 15 колледж ден техникумышто – эртаралтеш. Сеҥыше-влакым 10 мартыште палемдат.