Санкт-Петербургышто профессионал мастарлыкым тергыше «Профессионалы – 2025» Всероссийский чемпионат мучашлалтын. Иктешлыше этапысе «Образований», «Сервис», «Производство», «Инженерный технологий-влак» аланлаште 287 участник шке моштымашыжым терген.
Марий Элын чапшым чемпионатыште Йошкар-Оласе сервисный технологий техникумын студенткыже София Салахова арален. Ӱдыр «Эстетическая косметология» компетенцийыште таҥасен.
Косметолог лийнеже
София Йошкар-Олаште шочын-кушкын. 29-ше №-ан школышто тунемын. тудо англичан йылме ден информатикым утларак йӧратен. Софиялан изиж годсек ӱп дене «модаш», тӱрлӧ причёскым ыштылаш келшен. Садлан, 9 классым тунем пытарымеке, Йошкар-Оласе сервис технологий техникумыш тунемаш каяш шонен пыштен. Косметолог-эстетист специальностьым ойырен налын. Кызыт 3-шо курсышто шинчымашым пога. Моторлык дене кылдалтше профессийым ойырен налмыжлан ик ганат ӧкынен огыл, тидлан куана гына. Студентке тунемме дене веле ок серлаге, моло мероприятийышкат кумылын ушна. Тудо кушташ йӧрата, сандене утларакшым тиде мастарлыкшым таҥасымашлаште ончыкта.
Тургыжланен да кугешнен
– «Профессионалы» чемпионатын финалышкыже икымше гана логалынам. Куратор-наставникем Юлия Васильева тылеч ончыч чемпионат-влак, моло таҥасымаш нерген эре каласкален. Мыланем тиде оҥайын чучын, да ты гана шкежат моштымашем терген ончаш шонен пыштенам. Республикысе этап годым моткоч тургыжланенам. Но вес этапыш куснымем нерген пален налынамат, моткоч куаненам, вет тиде – кугу опыт, у еҥ-влак дене палыме лияш, профессионал мастарлыкым шуараш сай йӧн. Но тунамат тургыжланымаш нигуш йомын огыл – тыгай кӱкшытыштӧ Марий Элын чапшым аралем. Тидын годымак кӧргыштем кугешнымаш кумыл озаланен, вет мый республикысе этапыште чылаштым ончылтен сеҥенам, – каласкала С.Салахова.
Санкт-Петербургыш кайыме деч ончыч София кажне кечын кыртмен ямдылалтын. Эн нелылан тудо парикмахер дене пырля эртыме этапым шотла, тунам марлан кайышаш ӱдырын образшым ямдыленыт.
Чемпионатыш мийымыж годым С.Салахова Санкт-Петербургын моторлыкшымат ончен коштын шуктен. Тушто тудо икымше гана лийын, садлан чылажат оҥайын чучын, урем дене йолын коштмыж годым мотор пӧрт ден ойыртемалтше зданий-шамычым фотош войзыде кертын огыл. Тыгак ӱдыр тушто илыше калыкын порылыкшым палемдыш.
Техникумым тунем пытарымекыже, С.Салахова шке шинчымашыжым пойдараш шона да тиде специальность денак умбакыже тунемаш кайынеже, шке пашаштыже сай специалист лийнеже. А кызыт тудо весела студент пагытлан куанен ила, яра жапыште книгам лудеш але, яндар южыш лектын, йолын кошташ йӧрата.
С.Салахован альбомжо гыч налме фото.