19 октябрьыште Йошкар-Оласе мэрын 28 стипендиатшылан дипломым кучыктеныт. Нунын коклаште – ик чолга ӱдыр Анна Тараткина. Студентке тыгай стипендийым тений сентябрь гыч налеш, а кодшо тунемме ийын Марий Эл вуйлатышын стипендиаткыже лийын.
Анна Тараткина илышыш ятыр шонымашым шыҥдараш шона. Шукерте огыл «Идалыкын студентше» конкурсышто нылымше гана участвоватлен. «Идалыкын интеллектше» номинаций дене кумшо верыш лектын. Тылеч посна ты конкурсыштак Аннан вуйлатыме «ТвоЙО» радиом идалыкын эн сай студенческий медиажлан шотлымо.
Журналистике аланыште
Анна МарГУ-со историй да филологий факультетын «Журналистике» пӧлкаштыже нылымше ий тунемеш. 2014 ийыште студент-влакын инициативышт почеш факультетыште радиостудийым ыштыме. Тыште журналист лияш ямдылалтше студент-влак тӱрлӧ материалым ямдылат. Тӱҥ шотышто утларакшым 10 наре ӱдыр-рвезе чолган тырша. Нуно посна выпускым ямдылат. Аудиозапись семын интервьюм, радио-пьесым возат да подкаст семын (йӱкан да видеофайл-влак) савыктат.
Икымше курсышто тунеммыж годым Анна «Идалыкын студентше» конкурсышто «Идалыкын журналистше» лӱмым сулен, призовой верыш лектын. Варажым ты конкурсыштак МарГУ-н медиарӱдержын да «ТвоЙО» радион пашаеҥже семын сеҥыше радамыште лийын.
«Кодшо ийын «ТвоЙО» радио Росмолодёжьын грантшым сеҥен. Тунам ме Марий кундемысе автор-влакын произведенийыштлан рушла да марла подкаст-влакым ыштенна. Тений шошым «Открытие» банкын конкурсыштыжо грантым пуышт. Тушто радиовӱдышӧ Камиля Хамидуллина сеҥен. Туддене «На одной волне» проект почеш пашам шуктена, студент-влак дене интервью-влакым ямдылена», – каласкалыш «ТвоЙО» радион тӱҥ редакторжо А.Тараткина.
Кумыл йодмо почеш
Анна шкенжым тӱрлӧ вере тергаш огеш ӧр. Эн чотшо ӱдырлан журналистике келша, тыгак спортым, музыкым, художественный литературым, интеллектуал модыш-влакым, кидпашам йӧрата.
«Мый Николай Островскийын «Как закалялась сталь» романжым моткочак йӧратем, сандене девиземлан тушеч налме цитатым шотлем: «Илышым туге илен эртараш кӱлеш, варажым цель деч посна илыме идалык-шамычлан ойгыраш огыл». Илышыште икте-весылан келыштаралтмаш, паша ден йӧратыме сомыл, йолташ ден еш-влак коклаште баланс манмет лийшаш. Ала-могай лектышым налме, сеҥымашыш шумо нерген ом шонкале, лач илыш куаным да весе-влаклан пайдам кондыжо. Вара тудо шкеже иктаж-могай посна кӱлешан сомылыш савырна, сай лектышым пуа», – ойла студентке.
Вашке диплом…
Аннан уш-акыл дене ойыртемалтмыж нерген эше теве мом ешараш лиеш. Тудо школ годсекак «Мо? Кушто? Кунам?» интеллектуал-спорт модышышто участвоватла. Кызыт факультетын сборныйыштыжо модеш. Шкеж гаяк ушан ӱдыр-рвезе-влак дене пырля республикысе этапыштат ятыр гана призовой верыш лектын. Тений Аням Марий Элын сборный командыжын составышкыже пуртеныт, республикнан чапшым Юл кундемысе федеральный округышто арален.
Кызыт А.Тараткинан сомылжо кӱжгӧ – диплом пашам возыман. Тидлан ӱдыр оҥай темым ойырен налын. «Матч ТВ» телеканал ден «Советский спорт» газет негызеш Российысе спортивный СМИ-влакын вес еҥын шонымашыжым ончыктымыштым да эрыкан улмыштым радамла. Тылеч посна «Молодёжная жизнь в Марий Эл» газетлан тӱҥ шотышто спортсмен-влак нерген статья-влакым ямдыла, тӱрлӧ журналлашке научный статьям воза.
Эльвира Терентьева.
Е.Зыкован фотожо.