Советский посёлкышто илыше Алексей Милютин И.С.Палантай лӱмеш тӱвыра да сымыктыш колледжыште икымше курсышто тунемеш, актёр лияш ямдылалтеш. Тунемме деч вара «Эрвел марий» ансамбльыш коштеш. Усталык шӱлышан рвезе гитарым, гармоньым шокта, почеламутымат воза.
Почмо омса кече «полшен»
– Шочынамже Советский район Яҥгранур ялыште – ачам тушечын. Йочам годым ешна Советский посёлкыш илаш куснен. Изиэм годым ачам семын водитель лияш шоненам. Школышто чолгалык дене ойыртемалтын омыл, а индешымше классыште йолташем дене тӱрлӧ мероприятийыш ушненна, чӱчкыдын сценыште муренна. Тӱрлӧ пайремлан ямдылыме изирак концертыштат выступатленна.
Индешымше классыште мый ончыкылык профессий шотышто кӧ лияш, пален омыл. Тунам школышкына Палантай лӱмеш тӱвыра да сымыктыш колледжын пашаеҥже-влак толыныт да Почмо омса кече нерген увертареныт. Тушко миенам. Мыланна колледжыште туныктымо тӱрлӧ профессий нерген каласкаленыт. Тыге актёрлан тунемаш пуренам, – палдара Алексей.
Уэш марла мутланаш тӱҥалын
Мӧҥгыштӧ ача-ава пелен илаш моткоч сай. А шочмо пыжаш гыч кайымеке, чылажымат шке ыштыман. Тӱшкагудышто илаш тӱҥалмекыжат, Алексейлан тидын шотышто нелырак лийын. Но рвезе студент илышлан вашке тунем шуын. Пырля тунемше шкеж гаяк марий ӱдыр-рвезе-влак дене моткоч веселан илат. Советский посёлкысо 3-шо номеран школышто тунеммыж годым А.Милютин утларакшым рушла гына мутланен гын, колледжыш тунемаш пурымекыже, уэш марла кутыраш тӱҥалын.
– «Сценическая речь» ден «Сценическое движение» дисциплине-влак утларак келшат. Актёрлан умшамат чын почын, тӱрвымат кӱлеш семын тарватен моштыман. Южо мужыр-влак театрыштак эртаралтыт. Спектакль репетиций-влакым ончаш коштына. Икмынярыштыже шкеат тӱшка сцене годым лектына. Тыгай годым, палыме актёр-влакын модмыштым ончен, мыят иктаж-кунам тыге модаш тӱҥалам манын шонем, – ойла рвезе.
Тунемме деч вара – репетицийыш
Кастене А.Милютин «Эрвел марий» ансамбльын репетицийышкыже вашка. Ты коллективыш тудым пырля тунемме йолташыже икмыняр гана ӱжын. Ик кечын Алексей, «Айда каена, ончалына» манын, репетицийыш каяш кӧнен. А кокымшо гана мийымыж годым тудым кушташ шогалтеныт – тушто тунам ик рвезе ситен огыл улмаш. Ончыч рвезылан йӧндымын чучын. Моло-влакым ончен, почешышт тарванылын. А вес гана мийымыжлан движений-влакым сайынак тунем шуын.
– Тунемме, репетиций деч вара тӱшкагудыш кастене лу шагатлан гына толын пурем. Кочкаш шолтем, вес кечылан пуымо мӧҥгӧ пашам ыштем. Южгунам нойымо гай чучеш. Но жаплан гына. Вет кызыт мом ыштем, ончыкыжым профессийыштем кӱлеш лиеш. Пырля тунемме йолташем-влак кумыллан волаш огыт пу. Нунын дене пырля, кухньышто погынен, кочкаш ямдылена, тӱрлӧ мыскарам ыштылына, – манеш рвезе.
Гитарым, гармоньым…
Алексей гитарым шокта. Ты семӱзгарым индешымше классыште тунеммыж годым шочмо кечыжлан налыныт. Шокташат шке гыч тунемын. Тудлан утларак ныжыл, лирике сынан семым лукташ келша. Южо руш сем почеш марла текстым шке келыштара. Почеламут корнылам школышто тунеммыж годымак возаш тӱҥалын. Илен-толын, мурымат возаш шонымаш уло, палемда рвезе.
Гармоньымат шокта. А «Эрвел марий» ансамбльыш кошташ тӱҥалмекыже, ты семӱзгарым шокташ эшеат сайын тунемаш кумылжо лектын. Алексейын планыштыже – ятыр кугу шонымаш. Нунын кокла гыч – колледжым тунем пытараш, профессионал актёр лияш.
А.Милютинын альбомжо гыч налме фото.