Тений Марий Элыште куд выпускник химий дене экзаменым 100 баллан сдатлен кертын. Нунын коклаште иктыже – Морко марий ӱдыр, Коркатово лицейын тунемшыже Анастасия Петрова.
Тыршен тунемын
Настя ЕГЭ-лан эше 10-шо классыште ямдылалташ тӱҥалын. Химий дене шуко задачым решатлен, книгам лудын, олимпиадыште шинчымашыжым терген. Ӱдыр туныктышыжо Р.А.Новиковалан кугу таум ойла.
Раисия Александровна – туныктымо аланыште палыме еҥ. Тудо Российысе тӱҥ образованийын почётан пашаеҥже, Марий Эл образованийын сулло пашаеҥже, «Российын эн сай туныктышыжо» конкурсын кок гана сеҥышыже. Р.Новикован шуко тунемшыже медицине корным ойырен налыныт. Настя Петроват ончыкшым медицине аланыште пашам ыштынеже.
–Кушко тунемаш пурем рашыже эше ом пале. Чылажат экзаменым кучымо деч шога. Тыгеже Нижний Новгородысо але Чебоксарысе медуниверситетыште тунемнем. Эмлыме паша, стоматологий да химий направлений-влак кокла гыч эше ойырем, – манеш выпускнице.
Тамле кочкыш, марий сем…
Настя тунемме деч посна кочкаш шолташ йӧрата. Поснак кеҥежым тӱрлӧ саска, емыж гыч когыльым кӱэштеш. Шукерте огыл ешыжым самса дене сийлен.
Ӱдыр марла кушташ уста. Тудо Морко посёлкысо 2-шо №-ан школышто тунеммыж годым тӱвыра пӧрт пеленсе «Рвезылык» ансамбльыш кум ий коштын. Но 8-ше классыш Коркатово лицейыш тунемаш куснымеке, усталыклан жапше ситен огыл.
Кызыт выпускнице чыла экзаменым кучен, результатым вуча. Тыршен тунеммыже сай лектышым пуа манын ӱшанена.
Шке шонымашке шуаш пеҥгыдын ошкыл, марий ӱдыр!
А.Петрован альбомжо гыч налме фото.