Чаманен каласыман, Диана Сидоркина дене вашлийын мутланаш йӧн ыш лий. Тудо кызыт Моско областьыште, Звенигород оласе Олимпийский резерв училищыште. Йоча-влак тунемме деч посна чыла манме гаяк яра жапыштым тренировкышто эртарат. Но Диана соцсеть гоч икмыняр йодышлан содыки вашештен кертын.
Йошкар-Олаште шочшо марий ӱдыр 2-шо №-ан школышто тунемын. Тений 8-ше класс деч вара Звенигород оласе училищыш тунемаш пурен. Диана каласкала: «Футболла модаш изинек йӧратем. Эн ончыч йоча да самырык-влаклан спортшколыш футбол дене заниматлаш коштынам. Тушто тренерем Юрий Иванович Якимов лийын. Вара «Мариэлочка» клубышто заниматленам. Тушто тренировкым Евгений Леонидович Петров эртарен. А 2018 ий годсек «ZARA» футбол школышто модынам. Тренерем Анастасия Рауфовна Рахматуллина мастарлыкем нӧлташ чот полшен. Анастасия Рауфовна июньышто мыйым да эше кок ӱдырым, Карина Дубникова ден Евгения Коротковам, Звенигород оласе Олимпийский резерв училищыш ончыкташ намиен. Тушко тунемаш пурен кертмемлан моткоч куаненам. Карина ден Женян шонымашышт изиш шукталтын огыл. Туге гынат нуно училищын резервышкыже логалыныт.
Командыште мый нападающий лийынам, тыгак оборонышто полышкаленам. Юл кундем федеральный округысо да регион кокласе турнирлаште модынам. Илышем футбол дене кылдаш шонем. Шукынжо футбол пӧръеҥын спортын видше манын шонат. Мый тидын дене ом келше. Йӧратыме футбол командем-влак ЦСКА ден «Реал Мадрид улыт».
Дианан аваже Анжела Сидоркина футболистке ӱдыржӧ дене кугешна да сеҥымашыжлан чыла ава гаяк эн чот куана. «Футболистке лияш кумылжым ончыктымо годым ончыч тореш лийынам. Тиде ӱдырлык спорт огыл шоненам. 5-6-шо класслаште Диана дене пырля тунемше рвезе-влак уремысе стадионышто арнялан кок-кум гана погынат ыле. Нунын коклаште Диана шкет ӱдыр лийын. Ӱдырем пеҥгыде койыш-шоктышан. Тудо шонымашкыже шуаш тырша, тӱҥалме пашажым шуэн огеш кодо, мучаш марте шуя. Кызыт мый дечем тораште. Конешне, ава семын ойгырем. Но мый палем: Дианан футболышто ончыкылыкшо волгыдо», — ойла ава.