31 январьыште Йошкар-Олаште Йоча да самырык-влаклан усталык полатыште йоча да самырык-влакын «Движение Первых» Российысе мер-кугыжаныш движенийыштын регионысо пӧлкажым почыныт.
Мероприятийыш Марий Элым Вуйлатыше Ю.В.Зайцев толын. «Ӱдыр-рвезе-влакын вий-куатышт, ончыко каяш да эре икымше лияш кумылышт шижалтыт. Тыгай самырык тукым дене илышыштына мемнам лач сеҥымаш-влак гына вучат, шонем», – палемден тудо.
Ӱмаште декабрьыште Москошто Марий Элын образований да науко министржын алмаштышыже В.Г.Гаврилова йоча да самырык-влакын Российысе мер-кугыжаныш движенийыштын I съездыштыже лийын. Ты съездыш Марий Эл гыч йоча-шамычлан мер организаций-влакын 13 еҥже, ик педагог-наставник, ача-ава общественностьын ик еҥже миеныт. Йоча да самырык-влакын Российысе мер-кугыжаныш движенийыштын Марий Элысе пӧлкажым вуйлатышылан О.В.Мелентьевам ойыреныт.
Тений регионысо пӧлкан Советшым пеҥгыдемденыт, эртарышаш мероприятий-влак шотышто планым ямдыленыт да Москош согласованийыш колтеныт, медиапланым ыштеныт. Тыгак социально-гуманитарный, экологий дене кылдалтше, патриотизм шӱлышан тӱрлӧ мероприятийым эртареныт: «Блокадный хлеб», «Фабрика Чудес Деда Мороза», «Подари свои 106!».