Мер Каҥаш вуйверын кумдаҥдыме погынымаштыже Российысе финн-угор калык-влак ассоциацийын (АФУН) марий кундемысе пӧлкажын пашаж дене палыме лийме. Ныл ияш отчетым республикыште ассоциацийын вуйлатышыже Светлана Пехметова ыштен.
Финн-угор тӱняште марий калык ончылно улмыжым пеҥгыдемден толеш. Поснак Интернет тӱняшке марий йылмым шыҥдарыме паша келгын ышталтеш. Тидын шотышто лингвист Андрей Чемышев эн шагалже 8 йыжыҥым эртыман манын палемда, кызыт ме визымшыште улына. Тӱвыра аланыште, моло шотыштат паша шукталтеш. Ончыкыжым финн-угор калык дене утларак лишемме шот дене пырля мероприятийым эртараш кӱлеш манын палемдыме. Самырык-влаклан посна фестивальым эртараш шонымаш уло да молат.
АФУН-ын республикыште ышталтше пашажым сайлан шотлымо. Верысе пӧлкам умбакыжат вуйлаташ С.Пехметовалан ӱшаныме.
17-18 декабрьыште Саранскыште АФУН-ын VII съездше эрташ тӱҥалеш. Тушко Марий Эл деч 10 делегат кая.
Э.Иманаев