Медведево район Нурма селаште илыше-влак кокла гыч икмынярын фермер семын тыршат. Тысе Ленин лӱмеш ялозанлыкын ончычсо тӱҥ агрономжо Анатолий Дмитриевич Егоровым да тудын пашаче ешыжым тыште чыланат палат. Нунын кум гектар наре кумдык курал-ӱдымӧ мландышт уло. Тушто ушменым, ковыштам куштат. Шукерте огыл чот эр шушо ковыштамат поген нальыч.
Ешге пасушто
Анатолий Егоровым, Людмила пелашыжым, пелашыжын Надежда шӱжаржым, Семён ден Степан эргыже-влакым, Анастасия ӱдыржым, уныкаже-влакым: Озаҥ оласе энергетический университетын студентше Николайым, Йошкар-Оласе аграрный колледжыште тунемше Алексейым, Аннам – ковышта, вожсаска пасушто каныш кечышт годым тӱрлӧ сомылкам ыштымаште чӱчкыдын ужаш лиеш. Эсогыл куд ияш Саша уныкашт (Степан ден Валентинан эргышт) пакчашке ача-аваж дене пырля кумылын лектеш. Утларакшым тудо ковышта вуй-влакым изи орвашке опташ йӧрата.
Ты ешыште чыланат веселан, мыскара йӧре пашам ыштыше улыт.
Марий Турек районын шочшыжо
Анатолий 72 ияш. Тудо Марий Турек район Сӱльта ялыште шочын. Мамсинер ялысе пелекыдалаш школ деч вара Кугу Карлыган кыдалаш школышто шинчымашым поген. Спорт ден кылым кучен. Школ деч вара Крымыште илыше чӱчӱжӧ Анатолийым шкеж деке илаш наҥгаен. Пеҥгыде капкылан рвезе тышакын ЖБИ заводын пашазе ешышкыже ушнен.
Тышечак армийышке каен, Моско ола воктенысе кӱртньыгорно войскан ик частьышкыже логалын. Пелий учебкыште тунемын. Вара ушан, дисциплиным кучышо, шке сомылым сайын палыше сержантым командований взвод командирын полышкалышыжлан шогалтен. А тиде часть тудо пагытыште Москва – Йошкар-Ола кӱртньыгорнын кокымшо линийжым чоҥымаште тыршен. Тыге старший сержант Егоров шочмо олашке корным ыштымашке шке надыржым да моштымашыжым пыштен.
Армий гыч Анатолий шочмо ялышкыже толын да Нартас ялозанлык техникумышко агрономлан тунемаш пурен. Дипломым налмекыже, распределений почеш Медведево районышко Ленин лӱмеш колхозышко логалын. Бригадир, агроном сомылым икмыняр пагыт шуктен.
1987 ийыште Марий кугыжаныш университетын ялозанлык факультетшым «учёный-агроном» специальность дене тунем пытарен. Озанлыкыште тӱҥ агроном лийын. Шке пашажым моткоч йӧратыше агрономым ятыр гана тӱрлӧ шергакан пӧлек, грамот дене палемденыт. Озанлыкыште шурно лектышым кугемдымашке кугу надырым пыштымыжлан Анатолий Дмитриевичым «Марий Эл Республикысе ялозанлыкын сулло пашаеҥже» почётан лӱмланат представленийым ыштеныт. Но ала-могай амаллан кӧра палемдыме торжественный погынымаш кечын тудлан тиде лӱмым пуэн огытыл. А вара тидын нерген йӧршеш монденыт.
Шуко лудын
Агроном семын Анатолий шке квалификацийжым эре нӧлтен. Шуко научный литературым лудын, семинарлашке коштын. Тидын годым оҥай случай-влакат тудын дене лиеденыт.
Икана Москосо ик совещаний гыч пелашыжлан пӧлек олмеш мӧҥгыжӧ ик чемодан сортовой пареҥгым конден. Тудым вожаҥден, вожшым ойырен, 500 стаканеш илаҥден, ямдылыме мландышке шынден. Но игечын кенеташте йӱкшемдымыжлан кӧра чыла кылмен. Пареҥгын угыч вожештмыжым вучымо, вожым угыч шындыме. Но адакат йӱдым йӱштӧ налын. Кок пачашан плёнко дене леведме икмыняр пареҥге веле аралалт кодын.
Кызыт илалше агроном тыгай случай-влакым шарналта да шыргыжалеш веле. «Юмылан тау, тазалык начаррак гынат, але илем. Теве чот эр шушо ковыштамат шуын, лектышыжат начар огыл. Тӱҥжӧ йӧратыме пашаштем чаракым шындыше нигӧ ынже лий», – ойла тудо.
Иван Речкин.
Авторын фотожо-влак.