Кугурак класслаште тунеммыж годым Аннан, полиций пашаеҥ-влакым ужын, шкенжынат тыгай формым чияш кумылжо лектын.
Лач тудо жапыште Йошкар-Оласе 29-ше №-ан школышто МВД классым чумырымо нерген увер шинчажлан пернен. Тушко тунемаш пураш шонен пыштен. Тыге Анна Тубердинан МВД-ште корныжо тӱҥалын. Кызыт ӱдыр – Россий МВД-н Йошкар-Оласе управленийыштыже общественный порядкым оролымо пӧлкан инспекторжо.
Участковыйлан тунемын
Анна Йошкар-Олаште шочын-кушкын. Тубердинмыт ешыште МВД органыште служитлыше тетла уке. Ача-аваже Аннан изажым МВД-ш служитлаш колтынешт улмаш, но рвезын чонжылан вес сомыл келшен. Ӱдырышт тиде корным ойырен налмылан куаненыт гына.
Анна изинек бассейныш ияш коштын. Республикысе таҥасымашлаште ончыл верыш лектын, Российын первенствыштыже вийжым терген, спорт мастерыш кандидат марте шуын. Эше аваже мураш коштыктен.
– Школышто тунеммем годым физкультурым туныктышат, иймаш дене тренерат лийнем ыле. Жап эртымеке, кинолог профессий пеш келшен. УФСИН-ын вузышкыжо тунемаш пураш кайынем ыле, но ӱдыр-влаклан ойырымо вер кодын огыл манын каласеныт. МВД классыш йолташ ӱдырем дене коктын пураш шоненна, но тудо ситыше баллым поген кертын огыл.
Кадет классыште вигак келшен. Эркын МВД системе дене палыме лийынам. Школ деч вара Россий МВД-н Белгородысо Путилин лӱмеш юридический институтыш тунемаш пуренам. Вич ий участковый уполномоченныйлан тунемынам, МВД-н кӧргӧ системыжым пален налынам. Институтышто эн ончыч дисциплинылан тунем шуынам. Паша коллективыштат, калык денат шкем кузе кучаш, пален налынам. Криминологий дисциплине утларак келшен. Тыгак физподготовкыш, лӱйкалымашке куанен коштынам. Бронежилет, каске ден куржталынна, чодыраш институтын базышкыже лектеденна. Иймашке коштмем, спорт дене кылым кучымем тунеммаште пеш полшеныт, – манеш А.Тубердина.
Правилым пудыртыман огыл
Институтым тунем пытарымеке, 2020 ий сентябрьыште ӱдырым Йошкар-Оласе 3-шо №-ан полиций отделыш участковый уполномоченныйлан пашаш колтеныт. Тушто тудо пел ий наре служитлен, варажым Йошкар-Оласе УВД-ыш кусареныт. Кызытсе пашаже Анналан утларак лишыл.
– Ончыч участковый уполномоченныйлан пашам ыштыше пӧръеҥ-влакым гына ужынам. Шкеже тиде пашам ыштен ончымеке, ӱдырлан тиде службышто куштылго огыл манын кертам. Кызытсе паша верыштем каньылырак. Олан администрацийже, правам аралыме шотышто общественный формирований, оролымо частный предприятий, Росгвардийын ОМОН да моло организаций дене пашам ыштена. Олаштына иктаж-могай кугу мероприятий эртаралтеш, мутлан, Сеҥымаш кече, тӱшкан погынымо верлаште правилым шуктымо пашам организоватлена, – каласкала Анна.
А.Тубердина 9 шагатлан пашаш толеш да кастене кандаш шагатлан мӧҥгыжӧ миен пура. Документ-влакым ямдылыман, планым, приказым возыман. Коронавирус чер шарлымеке, пашаштышт лӱмын группым чумыреныт. Ты группо самоизоляцийыште улшо-влакын правилым шуктымыштым, тӱшка верлаште еҥ-влакын маскым чийымыштым да моло правилым шотыш налмыштым терген.
Пашам варалан ок кодо
Анна – пеш ответственный ӱдыр. Тудо ыштышаш пашам варалан кодаш ок йӧрате, йӧн уло гын, чылажымат ончылгоч шукташ тырша.
– Варалан кодаш гын, кӱчык жапыште ыштышаш пашам шот дене шукташ ок лий, – манеш тудо. – Службышто шындыме цельыш шуын моштышо лийман. Поро улам, но кӱлеш годым «уке» манаш тунемынам. Шкаланем ончыкылыклан пашаште у кӱкшытым, еш пиалым тыланем ыле. А МВД органыште пашам ышташ шонышо ӱдыр-рвезе-влаклан спорт дене кылым кучаш тыланем. Спорт – тиде илыш. Тыгак тунемаш ӧрканыман огыл, вет ме еҥлан огыл тунемына, шинчымаш шкаланна кӱлеш.
Кызыт ӱдыр бассейныш шуэнрак коштеш. Кеҥежым ача-аваж дене пырля садыш миен толеш. Телым Корто ече базыш чӱчкыдын кудалыштеш.
Эше Анна машинам виктараш йӧрата. Изинек ачаж дене пырля машинаште шинчын коштын, мо-кузем ончен, шымлен. А.Тубердина поро кумылан, тыматле. МВД органыште тыгай пашаеҥ-влак тек шукырак лийыт.
А.Тубердинан альбомжо гыч налме фото.