Маша – оласе ӱдыр, школ деч вара колледжыш поварлан тунемаш пурен. Мыят тушто тунемынам. Йолташ ӱдырем дене пырля каникуллан эре мый декем ялышке кудалыштынна. Тунемме годымак Маша каче дене келшаш тӱҥалын. Тудыжо сварщиклан тунемеш ыле. Шкеже Морко район гыч. Кеҥежлан, тунем пытарымылан, сӱаным ыштеныт да ялышке илаш кусненыт. Маша столовыйышко пашаш пурен, а Миша ик фирмыште тыршаш тӱҥалын.
Тунем пытарымылан вич ий темме вашлиймаш годым Маша тыгай случайым каласкален.
Пелашем мыйым моткоч йӧратен. Пӧлеклан ола гыч ача-авана воштончышым конденыт. Тудым Миша кровать ваштареш сакен.
Ик йӱдым вӱдым подылаш кынелынам. Кухньыш миен тольым, пелашем кроватьыш пурен шинчын да шинча, воштончышыш туран онча.
– Мо лийыч? – йодам.
– Мый денем ала-могай ӱдырамаш шупшалалташ пижеш – манеш – но тый огыл. Пеш мотор, канде шинчан, ошалге ӱпан.
– Ай, так, шаярет, – воштылальым.
Вес кечын адак тыгак лийын. Мый пелашемлан ӱшанен омыл.
Ик кечын пашаште лийме годым телефонышкем сообщений толеш:
«Маша, таче мӧҥгӧ вараш толам. Пашаште кучалтам».
«Мишан пашаже шуко, витне, йӧра ыштыже, шукырак пашадарым конда, ала у кроватьым налын шындена» манын шоналтышым.
Вес кечын паша деч ондакрак лектым. Автобусышто кудалме годым машина эртен кудале. «Тидыже мемнан машинас, Миша дене пырля мӧҥгӧ кудалын кертына», – шоналтышым да автобус гыч остановкеш волышым. Но машина чарненат огыл. А мый тыгак остановкеш вес автобусым вучаш кодым.
Ик арня жапыште Миша дене ышна кутыро, сыренна. Малашат посна возынна, тудо мыйым залыш веле поктен луктын. А вара пален налынам: пелашемын вес ӱдырамашыже уло. Шуко шонен омыл, вургемем погалтен, олашке кудал толынам.
Авамлан чыла каласкаленам. А тудо шке пӧлекше нерген шарналтен.
– Воштончышем конден отыл мо? – йодеш.
– Уке, туштак кровать ваштарешак кеча, – вашештышым.
– Эх, ӱдырем, воштончышым кровать ваштареш сакаш огеш лий. Кӧ тушко ончалеш, ласкан каналтен, мален ок керт, маныт. Пале почеш, тидыже вате-марий ондалкалымашкат шукта.
ВАЛЕНТИНА.
Параньга район.