Марий самырык театрын артистше Артём Иркабаевлан йомакыште утларакшым шыде персонаж-влакым, мутлан, Пирым, Пийым, Людоедым, Крокодилым, модаш логалеш. Тыгодымак тудо поро кумылан образ-влакымат чоҥен, «Принц и Чудовище» йомакыште Принцым келыштарен, У ий годым Йӱштӧ кочайыш савырнен. А теве «Жила-была Сыроежка» йомакыште Рыжикым модмыжо Алина ӱдыржын шӱм-чонышкыжо чотак возын.
Ты артистын кушеч улмыжым Иркабаев фамилийже гычак палаш лиеш.
Чынжымак, тудо ты театрын художественный вуйлатышыже О.Г.Иркабаевын тукым шольыжо лиеш.
Артёмын Валентина аваже – Олег ден Юрий Иркабаевмытын шӱжарышт.
Такшым ешыштышт кум ӱдыр да кум эрге кушкыныт.
26 майыште А.Иркабаев 35 ийым тема, а тӱвыра аланыште тыршымыжлан 15 ият шуэш. Тидын лӱмеш 27 майыште Марий самырык театрыште актёрын бенефисше эртаралтеш. Ты кечын сценыште тудо Мария Илибаеван «Торешватесолаште – томаша» пьесыж почеш шындыме спектакльыште Ипполитын рольжым келыштара.
Фотошто — Надежда пелашыж дене пырля.
УМБАКЫЖЕ — «КУГАРНЯ» газетыште лудса.