Марий Турек район Марий Купто ялыште шочшо Артём Орлов кызыт шке ешыж дене Москошто ила да РФ МИД-ште пашам ышта.
Эртыше кеҥежым марий кумылан улмыжым пеҥгыдемдыш. Тудо шочмо ялыштыже тӱвыра пӧрт дене пырля йоча-шамычлан «Иле, мыйын калыкем да шочмо йылмем» конкурсым эртарыш, рашрак каласаш гын, организаторжо да спонсоржо лие.
Ты мероприятийым Артём Александрович марий йылмын ончыкылыкшо верч тургыжланымыжлан кӧра тарватен. «Тудо тыгерак каласыш: «Тек марий йылме ынже йом, а коча-кована-влаклан шке уныкашт дене ялыште марла гына кутыраш тыланем».
Мо оҥайже: А.Орлов конкурсыш ушнышо кажне йочалан выступленийже деч вара йодыш-влакым марла пуэден. Ты таҥасымашке утларакшым ял деч ӧрдыжтӧ илыше икшыве-влак толыныт, марла муралтеныт, кушталтеныт, почеламутым каласкаленыт.
Артём Александрович шочшыжо-влакланат марий лӱмым пуэн. Пошкырт кундем Нефтекамск олаште шочын-кушшо Олеся пелашыж дене Яндар ден Онарым куштат. Нунын дене марла гына кутырат.
Э.Терентьеван фотожо.