Ончыкылык нерген шижтарыше омым чӱчкыдын ужам. Омем нерген южгунам мондем, а вара, жап эртымеке, иктаж ситуаций лиймек, тидын нерген омем шижтареныс манын шоналтем.
Тений телым колышо авам кончен. Тудо мыйым кугу теплоход дене круизыш пуйто ӱжеш. Эҥер дек лишемна, а тушто калык шыҥ-шыҥ. Вӱдыштӧ икмыняр пачашан кугу теплоход шога. Ончем, кажне пачашыште еҥ-влак радам дене тарванылде кият, вургемышт икгай, тора гыч спецовко гай коеш. Серыште кок еҥ билетым терген пурта. Авам дене черетыште шогена, а мый эре теплоходыш ончем. Молан еҥ-влак кият, малат мо, шонем.
Тыге шогышемла, авам йомдарышым. А билет-влак тудын дене улыт. Еҥ-влак коклаште палыме чурийым пеш кычалам. Билетым тергыше кок ӱдыр деке лишемым да мо лиймым умылтарышым. Ик ӱдыржӧ шинчашкем тура онча. «Билет деч посна нигӧм огына пурто», – манеш. А мый ом чакне, тыгай лӱман улам, тушто шочын-кушкынам, манам, авамын лӱмжымат ойлем. Но мыйым теплоходыш садак ышт пурто.
Эрдене помыжалтынам да омем нерген шонкален кием. Колышо еҥ иктаж-куш ӱжеш гын, пырля каяш сай огыл. Йӧра, авам дене пырля теплоходыш шым шич, шонем.
Тений шошым нелын черланышым. Эмлымверыште ятыр жап кияш логале. Черетан тергалтмаш годым анализым сдатлаш поликлиникысе ик кабинетыш пурышым. Медшӱжар ваштареш шинчым, тудо шинчашкем тура ончале. Тиде ӱдырым омыштем ужынамыс. Теплоходыш билетым терген пуртышо кок ӱдыр гыч – иктыже. Шинчажат тыгаяк ошалге канде тӱсан. Омыштемат тудо тыгакак шинчашкем ончале. Тыгаяк сур тӱсан формым чиен ыле манын шонем. Мо кӱлешым ыштымеке, саде медшӱжар мане: «Чытышым тыланда. Тӱҥжӧ – сайлан ӱшанаш». Ӧрмем дене нимом шым вашеште, кабинет гыч лектын кайышым.
Чынак, кызытат сайлан ӱшанен илем, палем: черым сеҥен кертам. «Черым тӱҥалтыш стадийыште пален налме, садлан сеҥаш лиеш», – маныт врач-влак.
Е.Тимофеева. Йошкар-Ола.