Тиде 2013 ийыште 15 ияшем годым лийын. Акам-шамыч да пошкудо ял гыч йолташ-влак дене пырля вӱд воктеке канаш машина дене кудалынна.
Миен шумеке, тулотым ужна, пуйто тудым ала-кӧ кудалтен куржын. Рвезе-влак укш-шамычым пулан погаш кайышт, а ме кугурак акам дене тул воктене шоген кодна. Тиде жапыште вӱдыштӧ пуйто кугу колын почшо дене перыме йӱкым кольым, савырнен ончальым – вӱдыштӧ нимогай оҥгат уке. Чылан тулото дек погынен шогалмеке, мыйын кенета вием кайыш, камвозаш тӱҥальым. Вара мо лиймым сайынжак ом шарне, но ойлымышт почеш, «айда каена» да «айда каена» манын сӧрвалаш тӱҥалынам.
Мыйым машинаш писын шынден, плотина воктеч кудал лектыныт. Шарнем, шинчашкем фонарик дене волгалтареныт, кидшерем тергеныт. Плотина воктеч лекна гына, мыланем тунамак сайрак лийын.
Мӧҥгӧ толмеке, ме клатыш малаш возынна, но омо толын огыл, а тӧрза гыч пурышо тылзе волгыдо южышто ала-мом койыктен, тидым мый умылтаренат ом керт. Тыге кок йӱд шот дене мален кертын омыл. Кумшо йӱдым веле иканаште мален колтенам. Тунам омыштем шучко ия кончен. Йолжо кыдал марте да вольыкын гай ыле, капше ден кидше – явыген пытыше айдемын, а вуйжо казан гай, шучко кужу тӱкан. Тудо йошкар шинчаж дене мыйын малымем тӧрза могыр гыч ончен шоген. Иканаште шӱлалтенат кертын омыл да тӧршталтен помыжалтынам. Выключатель марте нушкын каен, тулым чӱктенам. Вара гына шӱлалтен кертын, шортын, кӱварыш пуреҥгаенам. Тиде жапыште акам помыжалтын, мыйым ӧрын ончен шинчен, шкеж деке малаш пыштен.
Осал вий дене вашлиймым вара гына умыленна. Тудо плотина нерген ожнат пеш сайжымак ойлен огытыл. Тушто русалке ила манмым шуко гана колынна. А кугу колын почшо дене вӱд гыч перымыже ала тудак лийын? Но мый шкеат, палыде, моло-шамычым тиде вер гыч утарен луктынам, чыла осалым пырля мӧҥгем намиенам.
Осал вийым вашлиймеке, тулым ончен гына суртышко пурыман, маныт. Уке гын осалым почешат пурташ лиеш.
НАДЕЖДА, Морко район.