Пӧлемым айлен илаш кычалмем годым мыланем 21 ий лийын. Увертарымаш почеш ик рвезе дене эрдене вашлияш кутырен келшенна. Тудо мыланем илыме верым ончыктышаш ыле. Ончаш кайыме деч ончыч авамлан тидын нерген ойленам. Тудо йӱдымак омым ужынам. Пуйто ты рвезе дене вашлийынна. Тудо мыланем пӧлемым ончыкта. Тошкалтыш воктеч эртымына годым мыйым шӱкалеш, подвалыш камвозам. Тушто кровать шинча. Рвезе мыйым кровать воктене кылден шында. Трукышто шинчам почылтеш. Шкеже лӱдынам да чытырем. Телефоныштем авам деч смс-серыш: «Вашлияш кутырен келшыме рвезе деке ит кошт. Чоныштем сай огыл шижмаш озалана. Тудо осал рвезе».
Омысо сӱрет, авам деч смс, – таклан огыл дыр чыла тиде манын шоналтенам да вашлиймашке каен омыл. Тидлан тачат ом ӧкынӧ.
Маргарита Б.
Юрино посёлко.