15 март – Омын тӱнямбал кечыже. Илышын кумшо ужашыжым айдеме мален эртара. Малыме годым организм вийым пога, шкенжым «шотыш конда». Тазалыкым аралыме тӱнямбал организацийын данныйжылан келшышын, айдемылан суткаште 6-8 шагатым малыман. А те, пагалыме лудшына-влак, мален темыда? Кастене мынярлан возыда да эрдене мынярлан кынелыда?
Владимир Макаров, Морко район:
– Кажне кастене индеш шагатлан телевизорым йӧртем, да чылан малаш возына. Эрдене вич шагатлан кынелам да вольыкым пукшаш лектам. Пелашем да икшывына-влак куд шагатлан кынелыт. Кажне кечын тыге, каныш годымат. Тиде режим чылалан йӧнан. Кеҥежым кече кужу, садлан 10-11 шагатланат возына. Но садак эр кынелына.
Евгения Чемекова, Озаҥ ола:
– Эше ик ий ончыч вес режим дене иленам: кастене лу шагат деч вара малаш возынам да эрдене куд шагат эрталтен кынелынам. Паша верым вашталтымеке, режимем лугалтын: ынде кажне кечын тӱрлӧ жапыште малаш возам, южгунам пелйӱд эртымешат паша дене шинчылташ логалеш. Садлан мален темаш ок логал. Южгунам маршрутко дене пашаш кудалме годым пробкышто кужун шогаш перна, тыгай годым нералтенат шуктем. Организмем канен ок шу, тиде шижалтеш, садланак пытартыш жапыште ондакрак малаш возаш тыршем. Тиддеч пел шагат ончыч телефоным кидышкем ом нал, соцсетьлаш ом пуро – книгам лудам. Тидыже вашке мален колташ – эн сай йӧн. Каныш кечын гын режимем «пужла».
Марина Скуратова, Йошкар-Ола:
– Мален темме нерген шонымымат чарненам – йочам дене декретыште улам. Туге гынат кертме семын режим манмым вуйышто кучаш тыршем. Вет кугурак эргым школыш коштеш, тудлан мален темман. Кастене лу шагатлан малаш возына, эрдене куд шагатлан будильник кычкыра. Йочам пукшаш йӱдым кынелаш логалеш. Кечывалым йочам малыме годым пырля малымаш уке: кочкаш шолтем але пачерыште порядкым ыштем.