Курыкмарий район Шайыл Пӧртныр ялыште мастар тукымышто шочшо Владимир Алманов творческий пашам ынде 35 ий шукта. Тений тудо илыме верыштыже (Моско областьысе Сергиев-Посад ола) шке мастерскойжым почын.
Марий кундемын эргыже Йошкар-Оласе 1-ше номеран музыкально-художественный школ-интернатыште тунемын. Тений тудым пытарымыжлан 30 ий темын. Тидын вашеш ты тунемме тӧнежыште мастарлык корныш лукшо туныктышыжо Юрий Морозов дене вашлийын. Владимир Алманов шочмо вершӧрыштыжӧ икмыняр кече лийын, ача-аваж дене мутланен, ик корно дене ошкылшо йолташыже-влакымат ужын.
Ача семын пиалан
Владимирын ачажым, Николай Петрович Алмановым, шкешотан да ойыртемалтше сӱретче семын палат. Мастарлык эргыжланат куснен.
Владимир пелашыже Маргарита Игоревна дене коктын кум икшывым ончен куштеныт. Мо оҥайже: Маргаритан икымше профессийже маркетинг да рекламе дене кылдалтын. 29 ияш улмыж годым, шке илышыжым вашталташ шонен, Богородское посёлкысо художественно-промышленный училищыш каен. Тунам тушто Владимир туныктен. Нуно Ритан икымше курсым тунем пытарымыж деч вара вашлияш тӱҥалыныт, сандене педагог туныктымым чарнен.
Кугурак ӱдырышт, 24 ияш Виктория, шке илышыжым медицине дене кылден. Моско областьысе Богородское селаште фармацевтлан пашам ышта.
Максим эргышт Сергиев-Посад оласе ик техникумышто чоҥымо да отделке пашам шуктымо профессийым налеш. Рвезе сӱретлаш йӧрата, ачажлан полшенак, тӱрлӧ усталык пашалан кумылаҥын. Телым ача ден эргыже лумым пӱчкедат, моло сомылымат пырля шуктат.
Изирак Виталий эргыштат усталык шӱлышан кушкеш. Тений кеҥежым Владимир Николаевич тудын полшымыж дене Сергиев-Посад оласе «Загорское море» лесопаркыште олым гыч скульптур-влакым ыштылын.
Моско кундемыште
– Моско областьыште губернатор Андрей Воробьевын «Парки Подмосковья» программыж почеш парк-влакым сылнештарат, йырже мотор корным, кӱвар-влакым да молымат ыштат. Ты программе дене келшышын, мемнан деч кок композицийым олым гыч ышташ йодыныт.
Икымше композицийжым «Есть контакт» манын лӱмденна. Тушто кок улитке вашлийыт, вуйыштышт тӱкӧ гае антенне-влак улыт, пеш ала-мом шымлат.
Кокымшо пашана еш темылан пӧлеклалтын. Паркыште шуко ур кудалыштеш, сандене нуным ончыкташ кутырен келшышна. Ава-ур копаштыже пӱкшым кучен, а тудын игыже пушеҥге вуйыш кӱзен да аваж деч пӱкшым налаш кумык лийын, – каласкала Владимир Алманов.
Тылеч вара кидмастар-влакым вес проектым шукташ ӱжыныт: Сергиев-Посад районыштак верланыше «Пересвет» тӱвыра паркым сылнештараш. Тудо 74 гектар кумдык мландым айла. Кугу ер уло, шым памашым почмо.
Паркыште кугу арт-объект-влакым келыштарат. Владимир Алмановын мастерскойыштыжо лу еҥ тырша, тышеч нылытынже ӱдырамаш улыт. Нуно тӱрлӧ верым сӧрастарат. Эн ончыч кок композицийым ыштеныт. Олым гыч тыгай кугу скульптур-влакым ышташ лиймылан шукынжо ӧрыт. Тыгак ты парклан мастар-шамыч тупоҥа гыч «Рывыжым» ямдыленыт. Кызыт чыла скульптурым волгалтареныт, йӱдымат коеш. Шукерте огыл тышан вераҥдаш кугу шордым заказатленыт.
Владимир пелен самырык-влакат улыт. Максим ден Виталий эргыже-влак полшат. Теве Морко район гыч Денис Афанасьев пырля тырша. Тудо Богородскийысе училище деч вара институтышто кӱшыл шинчымашым налеш.
– Мый кокла ийготан улам, сандене самырык-влак дене кыл ок йом да нунылан шке моштымашем пуэн кертмемлан куанем. Теве Богородскийысе училищыште Кужэҥер район гыч Дима Смородиновым туныктенам ыле. Тудо мастарлыкшым нӧлтенак шога, икымше верлам наледа, – манеш курыкмарий мастар.
Иран марте
Владимир Николаевич Камчатке гыч тӱҥалын Калининград марте тӱрлӧ конкурс-фестивальыште профессионал улмыжым пеҥгыдемден. Тӱнямбал кӱкшытыштат тыршен, тӱрлӧ эл мучко мастарлык конкурсыш ушнен. Российын чапшым 14 гана арален.
Тений июньышто Иранын рӱдолаштыже (Тегеран) «Живые традиции России» выставкыште Российысе ятыр сомылым ыштымым ончыктымо. Тушко Владимир Алмановын пушеҥге гыч ыштыме кум пашажым: «Сузо», «Лайка пий чодыраште лумшым покта», «Маска колым куча» наҥгайыме. Искусствовед-шамыч тиде ончер Российын поянлыкшым ончыкта манын палемденыт.
Тений Москошто Российысе калык прикладной сымыктыш тоштерыште 500 утла пашам ушышо «Московский сокольничий» выставке эртаралтын. Тушко землякна пушеҥге гыч пӱчкедыме 30 пашам луктын. Озаҥыште ончерым почмо годым Калык кидпаша ассоциацийын президентше Геннадий Дрожжин ятыр автор кокла гыч Владимир Алмановын пашажым мокталтен.
Август мучаште Озаҥыште почылтшо «Победоносная Россия» ончерыштат пашажым ужаш лиеш. Ондак ты выставке Москошто, Санкт-Петербургышто, Уфаште ончыкталтын.
Автор «Ледовое побоище» теме дене кок метран скульптур-влакым кедр гыч ыштен. Сюжетыште дружинник Александр Невский рыцарь дене кучедалеш.
Кокымшо композицийыште – вич фигур. Преподобный Сергий Радонежский Куликовысо кучедалмаш деч ончыч князь Дмитрий Донскойым благословитла. Шеҥгелнышт монах-влак Александр Пересвет ден Родион Ослаблю шогат.
Тений мастарна Российын чапшым Казахстаныштат арален. Йошкар-Олаште «Легенды народа мари» фестивальым кок гана эртараш полшен. Но шкеже толын кертын огыл, ты жапыштак Екатеринбургышто лийше «Дивий град» фестивальыш каен. Тушко тӱнямбалне пашам ыштыше 10 мастар толын. А Йошкар-Олаште тыгай профессионал ушнен огыл. Тушто В.Алманов Уралысе инженер, апшат, кӱртньӧ изи шуршым ыштен моштышо мастар Александр Сысолятиным ончыктен да пашажым «Уральский левша» манын лӱмден, кокымшо верым сулен.
Тений 21-22 августышто кидмастар Хант-Манси АО-што «Чодыра йомак» фестивальыште лийын. Тушто Владимир Николаевич шуарыште чоҥештыше Вувер кувам да ныл йолан пӧртшым пу гыч келыштарен. Ты композицийлан кумшо верым пуэныт, пашам Ханты-Мансийскысе 1-ше номеран школыш вераҥдаш палемденыт.
Теле шумеке, профессионал-влак лум да ий гыч скульптур-влакым ышташ тӱҥалыт.
Эльвира Терентьева.
Фото-влакым еш альбом гыч налме.