Параньга район Олор ялыште тӱрлӧ спорт таҥасымашым, модмашым чӱчкыдын эртарат.
Йӱштӧ Кугызан кубокшо верч
Кодшо кечылаштат Йӱштӧ Кугызан кубокшо верч мини-футбол дене турнир лие. Олор ял тӱзланен толжо манын, тале спортсмен Евгений Бирюков шуко тырша. Тудо эше шке уремыштыже старостылан шотлалтеш. Тыгодым спортым чот йӧрата, тидлан самырык-влакымат кумылаҥда. Евгенийын тыршымыжлан кӧра ялыште тӱрлӧ спорт модмаш чӱчкыдын лиеда. Эсогыл пошкудо республик гычат тушко толыт.
Теве мини-футбол дене эртаралтше турнирышке еҥ шуко погынен ыле. Модмаш индеш шагат эр гыч куд шагат кас марте шуйнен.
– Турнирым Олор ялысе молодёжьын оксаже кӱшеш тений икымше гана эртарышна. Тудо ынде кажне ийын лиеш. Ты шотышто таум школ вуйлатыше Надежда Анатольевна Осиповалан ойлымо шуэш. Тудо спортзалым ойырен.
Турнирыш Параньга район гыч вич команде ушнен: Олор ял гыч кумыт, Кугу Пумарий села гыч кокыт. Марий Турек район гыч кум, Татарстан Республикысе Балтаси посёлко гыч ик команде дене модаш толыныт.
Модмашке шым номинацийым пуртымо, кажныштыже сеҥышым палемдыме, – мане Е.Бирюков.
Икымше верым Олор ялысе студент-влакын командышт налын. Кокымшо верыш Марий Турек посёлко гыч, кумшо верыш Балтаси гыч команде-влак лектыныт.
Волейбол дене турнир
Тиддеч ончыч ты школышто Олор ялеш шочын-кушшо да Чечнясе сарыште ӱмыр лугыч лийше Эдуард Токпулатов лӱмеш волейбол дене турнир лийын.
Тудым эртарен колташ Эдуард дене пырля тунемше йолташыже-влак оксам пуэныт, организатор сомылым ялысе активист Евгений Бирюков шуктен.
Тыгай турнир ынде икмыняр гана эртаралтеш. Эн ондак рвезым порын шарналтеныт, тушко тудын лишыл еҥже, родо-тукымжо, пырля тунемме йолташыже-влак погыненыт.
Модмашыш Параньга районысо Олор, Матародо, Ондропсола ялла, Параньга посёлко, Кугу Пумарий села, Кужэҥер район Шорсола ял гыч команде-влак ушненыт. Икымше верым Матародо, кокымшым Ондропсола, кумшо верым Марий Турек посёлко да нылымше верым Олор команде-влак налыныт.
Тыгай модмашым эртараш полшышо-влаклан, школышто физкультурым туныктышо В.Г.Порфирьевлан, тыгак повар-шамычлан Евгений Бирюков таушта.