Марий талешке кече вашеш 25 апрельыште Йошкар-Олаште Марий Сийгудышто «Марий патыр» конкурс лийын.
ШЫМ РВЕЗЕ ТАҤАСЕН
Тыгай мероприятийым Марий тӱвыра рӱдер кокымшо гана эртарен. Тушто кундемнан тӱрлӧ районжо да ӧрдыж верла гыч толшо шым рвезе шке мастарлыкшым, шочмо йӱлам палымыжым ончыктен. Участник-влак 15-35 ияш лийыныт.
Конкурс кум йыжыҥ гыч шоген. Икымше йыжыҥыште шке нерген палдараш кӱлын. Темыже тыге йоҥген: «Мый марий рвезе улам». Рвезе-шамыч, тӱрлӧ йӧным кучылтын, шкешт нерген каласкаленыт. Икте презентацийым ончыктен гын, весе муралтен, кумшо изирак сценкым модын.
Кокымшо йыжыҥ «Вий, проворлык да арвий» маналтын. Тудо кок ужаш гыч шоген. Икымшыште рвезе-шамычын шинчымашыштым тергеныт, йодыш-влаклан вашешташ кӱлын, а кокымшышто писылыкыштым, проворлыкыштым автоматым рончен-погымаште акленыт.
Варажым ешын да марий калыкын илыш-йӱлаштым почын пуэныт. Тыште ме рвезым армийышке ужатыме, Кугече пайрем, Изарня кас, кепшылым руымаш йӱла-влакым ужна.
УСТА СЛЕСАРЬ ДА ГАРМОНЬЧО
Конкурсышто сеҥыше Волжский район Карай ялыште шочын-кушшо, а кызыт Параньга район Олорышто илыше Сергей Савинов гармоньым сайын шоктымыж дене кумылым налеш. Тудо Волжск оласе индустриальный техникумым тунем лектын. Кызыт Моско олаште «Водоканал» предприятийыште слесарьлан тырша.
– Мый марий шӱлышан ешыште кушкынам: кочам ден авамын шӱжарже тӱмырзӧ лийыныт, чӱчӱм – гармоньчо. Мый гармоньымат шоктем, тӱмырымат кырем, тыгак семым возем. Йочасад гычак мураш-кушташ тӱҥалынам. Армий деч ончыч Карай ялысе «Шийгорно» ансамбльыш коштынам. Пел ий ончыч Йошкар-Оласе «Муро ӱмырым шуя» проектыш ушненам. Марий Эл, Киров кундемла мучко выступатлен коштынна, кызыт Башкирийыш каяш ямдылалтына. «Марий патыр» конкурсышто кокымшо гана участвоватлем, 2021 ийыште кумшо верыш лектынам ыле. Тений «Шийгорно» ансамбль полшымо дене ӱдырым налме деч вара йӱлам ончыктенна,– ойла Сергей.
МУРАШ-КУШТАШ КУМЫЛАН
Озаҥ ола гыч Алексей Гаврилов кокымшо гана ты конкурсышто шке чолгалыкше, мастарлыкше дене ойыртемалтын. Мураш кушташ йӧрата, семӱзгар дене шокта, марий калыкын музык культуржым шымла. Озаҥыште крановщиклан пашам ышта.
– Изиэм годым моткоч вожылшо лийынам, «Чолга шӱдыр» икымше муремым возымеке гына чыла вере ушнаш тӱҥалынам. «Озаҥ марий» да «Лай мардеж» ансамбльлаш вич ий наре коштам. «Марий патыр» конкурс марий калыкын шӱлышыжым, чонжым, патырлыкшым ончыкташ полша, сандене ты конкурсыш мый уло кумылын ушнем, – каласкала А.Гаврилов.
ЭН САМЫРЫК
У Торъял район Токтарсола ял гыч Родион Небогатиков эн самырык участник лийын. Тудо кандашымше классыште тунемеш, актёр лияш шона.
– Тӱҥалтыш школышто баяным шокташ тунемынам. Тыгак рушла да марла почеламутым лудаш йӧратем, тӱрлӧ проект пашам уло кумылын возем. 24 апрельыште Йошкар-Олаште Марий талешке кечылан пӧлеклалтше конкурсышто проектым араленам да кокымшо верым налынам.
«Марий патыр» конкурсышто йӱлам ончыкташ да автоматым рончен-погаш келшен. Кепшылым руымо йӱлам ончыкташ авам, Коля шольым да Лиана акам полшеныт гын, автоматым писын погаш мӧҥгыштӧ ачам дене пырля вич кече ямдылалтынам,– палемда рвезе.
Волжский район Мучашъер ял гыч Андрей Кудрявцев шуко шочшан ешыште кушкын. Ачаже Алексей Леонидович дене мӱндыр корныш лекше эргылан сугыньым пуымо йӱлам ончыктеныт.
СЕҤЫШЫЛАН – МОТОСАВА
«Чумбылатын ВийАрже» номинацийыште У Торъял район Токтарсола ял гыч Родион Небогатиков, «Йӱлам жаплыше» номинацийыште Морко район Унчо кыдалаш школын 11-ше классыштыже тунемше Никита Ксенофонтов, «Муро кумылан марий патыр» номинацийыште Йошкар-Ола гыч Дмитрий Горинов ойыртемалтыныт.
Икымше верым Татарстан Республик Озаҥ ола гыч Алексей Гаврилов налын, кокымшо верыш Оршанке район Кугунур селан шочшыжо Никита Козлов, кумшо верыш Юлсер кундемын эргыже Андрей Кудрявцев лектыныт.
Гран-прим Сергей Савинов налын. Тудлан мотосавам да пу гыч пӱчкедаш инструмент-влакым кучыктеныт.
Тыгай конкурс самырык тукым верч кугешнымаш кумылым луктеш, марий шӱлышан еҥ-влакым иктыш уша, кушкын толшо самырык тукымым йӱлам жаплаш, мунло лияш, шочмо мланде, калык верч шогаш туныкта.
Дарья БЫКОВА.
Авторын да Р.Николаеван фотошт.