Апрель мучаште Параньга район Олор школышто мини-футбол дене турнирым эртаренна. Тудо ялыште футболым вияҥдыше ветеран-влакым шарныме лӱмеш пӧлеклалтын.
Тыгай турнирым ынде ме кудымшо ий эртарена, тӱрлӧ командым иктеш чумырена. Ты гана модаш кумылан-влак шукын лийыныт. Куандарен: тений мемнан деке индеш команде ушнен: Олор, Усола ялласе, Кугу Пумарий, Матародо селаласе, Кужэҥер посёлкысо, тыгак эше Киров ден Татарстан кундемласе команде-влак. Чылаже 60-70 еҥ погынен. Эн изирак участниклан 15 ий лийын гын, эн кугулан – 40.
Модмаш сайын эртен, тудо эр гыч кас марте шуйнен. Икымше верым Татарстан Республик Балтач районысо, кокымшо верым Киров кундемысе, кумшо верым Олор ялысе, нылымше верым Кугу Пумарий селасе («Буревестник») команде-влак налыныт.
Ойыртемалтше модшым ме кандаш номинацийыште палемденна. Мутлан, «Эн сай бомбардир» лӱмым Олор ял гыч Марсель Бирюковлан пуымо. Ты рвезе футбол капкаш 19 голым пуртен. Олор ял гыч «эн сай защитниклан» Алексей Пайгельдиным, «эн сай судьялан» шкенан ял гыч спортсмен, Медведево район Руэм школышто физкультурым туныктышо Артём Коноваловым шотлымо. Турнирыште «эн кугу ийготан участник» номинацийыште Кугу Пумарий гыч Анатолий Николаевич Осиповым палемдыме.
Икымше верым налше командылан кубокым, медальым, грамотым кучыктенна, моло участниклан – медальым, грамотым да эше статуэткым.
Тыгай кугу спорт мероприятийым эртарен колтымеке, Олор школышто физкультурым туныктышо Валентин Григорьевич Порфирьевлан, тренер Евгений Семёнович Ямаевлан да школым вуйлатыше Надежда Анатольевна Осиповалан, повар-влаклан чон гыч лекше тау мутым ойлымо шуэш. Чыланат тыршеныт, молодец улыт!
Участник-влаклан модмаш келшен, ончыкыланат толына маньыч. Тидыже поснак куандара. Сандене умбакыжат тыгай турнирым эртараш тӱҥалына, шонем.
Е.Бирюков.
Параньга район Олор ял.