Параньга район Олор ялыште бильярд модмаш дене турнирым икымше гана эртарыме. Тушко 10 участник ушнен.
Олор ялыште самырык-шамычын жапышт пайдалын эртыже манын, ятыр спорт мероприятий, таҥасымаш-влак лийыт. Ты пашам ялын уста еҥже, тале спортсмен Евгений Бирюков виктарен шога. Тудын темлымыж почеш ты гана бильярд дене турнир эртаралтын. Модмаш ныл шагат шуйнен.
– Олор клубыш бильярд ӱстелым кок ий ондакак вераҥдыме. Тудым мыланна ик спонсор налын пуэн. Тӱҥ шотышто йоча-влак тушто жапым эртареныт. Олорышто бильярд дене сайын модыт. Молан турнирым эртараш огыл? Тыге шке окса кӱшеш кубокым, медаль, грамот, кружка-влакым нальым. Модаш кумылан-влак лектыч: эн изиракше 8-ше классыш коштшо лийын, эн кугуракше – 44 ияш. Участник-влаклан модаш пеш келшен. Умбакыжат тыгай турнирыш ушнаш кумылышт уло. Мартыште мужыр дене модмо турнирым эртараш палемденна, – мане Е.Бирюков.
Бильярд дене модмаште 1-ше верыш 9-ше классыште тунемше Даниил Бирюков, 2-шо верыш Михаил Очеев, 3-шо верыш Михаил Алеев лектыныт. Сеҥыше-шамычым (1-ше верлан тыгак кубокым) медаль, грамот-влак дене палемдыме, изирак пӧлекым пуымо. Участник-шамычланат пӧлекым кучыктымо.
Параньга районысо шуко ялыште бильярд ӱстел укеат, манаш лиеш. Олор ял тидын шотышто ончылно. Тӱҥалтыш уло гын, паша умбакыжат ушнен толеш, ты кундемыште бильярд модмаш вияҥеш манын ӱшанена.