Параньга район Олор ялыште шочын-кушшо, Чечня сарыште жап шуде ӱмыр лугыч лийше Эдуард Токпулатов поро, тыматле кумылан, гармонь дене сайын шоктен моштышо, спортым йӧратыше рвезе ыле. Сар огыл гын, тений тудлан 42 ий лиеш ыле.
16 апрельыште Э.Токпулатов лӱмеш Олор школышто волейбол дене турнир эртаралтын.
Илаш гына ыле, но…
Эдуард Токпулатов сайын тунемше, тыршыше, кожмак рвезе кушкын. Спортым йӧратен. Ачаже, изаже тале гармоньчо лийыныт, сандене ты мастарлык Эдуард декат куснен. Имньым пеш йӧратен. И.С.Палантай лӱмеш тӱвыра да сымыктыш колледжыште кок ий тунеммеке, тудо армийышке каен. Нижний Новгород оласе мотострелковый частьыште служитлен. 1999 ийыште шке кумылын Чечня сарышке каен. 1999 ий 17 декабрьыште тора мландыште 19 ияш Эдуард Токпулатов элнам аралыме верч ӱмыржӧ кӱрылтын. Тудым Патырлык орден дене палемденыт.
Кум гана турнир эртаралтын
2000 ийлаште Эдуард Токпулатов лӱмеш Олор школышто волейбол дене кум гана турнир эртаралтын. Но варажым тудо изиш мондалтын. 15 ий эртымеке, ялысе активист-влакын тыршымышт дене тений тыгай шотан турнирым уэш эртараш тӱҥалме. Волейбол дене модшо рвезе-влакын оксашт кӱшеш Э.Токпулатов лӱмеш кубокым, медаль-влакым, ыштыктыме, чапкагазым налме. Турнирыште сеҥыше командылан куснылшо кубок пуалтеш. Ик команде кум гана сеҥа гын, кубок туддене кодеш.
Школысо спортзалышке Эдуардын родо-тукымжо, пырля тунемме йолташыже, ялысе рвезе-влак погыненыт ыле. Рвезым шарныме лӱмеш ик минут чыланат шып шогеныт.
Турнирыш 70 наре модшо погынен. Олор (кум команде), Кугу Пумарий, Матародо, Ондропсола ялласе команде-влак модыныт. Икымше верышке Матародо, кокымшо верышке Ондропсола, кумшо верышке Кугу Пумарий, нылымше верышке ветеран-влакын Олор ялысе команде-влак лектыныт.
Волейбол дене тыгай турнирым Эдуардын колымо кечыж годым телым эртараш кутырен келшыме. Иктешлымеке, чыланат ӱстел йыр погыненыт.
Лилия Порфирьева, Эдуардын акаже:
– Ача-авамын ме вич икшыве кушкынна. Эдуард – эн пытартыш йоча. Поро кумылан, еҥлан полшаш эре ямде улшо рвезе ыле. Гармонь дене шокташ йӧратен. Кеч-могай семым колеш да шкеак куштылгын налеш ыле. Тудо шокта, ме мурена. Сӱретлаш мастарлыкше лийын.
Чечня сарыште лиймыж годым серышым чӱчкыдын возкален. Сар годсо илышым каласкален. Эре отпускышко толмыжым вученна. Но вучен ышна шукто. 1999 ий телым трукышто военный форман еҥ-влак суртышкем толын пурышт. Нуно вигак авам деке каяш ӧрыныт, эн ончыч изам деке фермышке миеныт, варажым мыйын суртышкем пуреныт. Эдуард шольынан колымыж нерген увертарышт. 22 ий эртен гынат, чонышто садак сусыр пале кодын.
Сандене Олор ялысе рвезе-влаклан тыгай турнирым эртарымыштлан кугу таум ойлем.
Елена Романова, пырля тунемме йолташыже:
– Классыште 22 икшыве тунемынна. Эдик пеш шыма, спортлан шӱман рвезе ыле. Ме йоча спорт школышко коштынна, баскетболла модынна. Гармонь дене сайын шоктен. Сандене туддене класс дене тӱрлӧ конкурсышко, фестивальышке миен коштынна. Икана призовой верышке лекмылан мыланна гармоньым пӧлеклышт. Пеш сай шарнымаш кодын.
