Волжск олаште 2-шо №-ан поликлиникым олмыктымо паша умбаке шуйна. Объектым июль марте ачален шуктышаш улыт.
1994 ийыште тиде эмлымверын оралтыжым Тазалыкым аралыме министерствылан пуымо. Тидын деч вара олмыктымо паша шот дене эртаралтын огыл. «Здравоохранение» нацпроектын «Модернизация первичного звена здравоохранения» программын полшымыжлан кӧра кызыт тиде поликлиникыште олмыктымо паша тӱҥалын.
Тачылан специалист-влак электропроводкым, ырыкташ ыштыме системым алмаштыл коштыныт, тыгак омсам, окнам, кӱварым да туврашым вашталтеныт.