Кодшо каныш кечылаште тунемше-влак коклаште Юл кундем федеральный округысо интеллектуальный олимпиадын регионысо йыжыҥже «Робототехнике» да «Программирований» направлений-влак дене эртен.
ПГТУ-н площадкыштыже отборочный таҥасымаш-влак лийыныт. Тушко районла ден олала гыч кандаш команде ушнен. Тунемше-влак робот-влак дене пашам ыштеныт: конструироватленыт да, посна задаче-влакым шукташ манын, роботым программироватленыт.
Робототехнический таҥасымаште сеҥышыш Йошкар-Оласе «Инфотех» лицейын командыже (Дмитрий Катягин ден Артем Садовин) лектын.
Программирований дене олимпиадыште ончыл верым Йошкар-Оласе «Мегатех» лицейын командыже (Анна Белякова ден Иван Ершов) налын.
«Решение изобретательских задач» направлений почеш Марий Турек кыдалаш школын командыже ойыртемалтын.
Сеҥышыш да призёрыш лекше-влаклан дипломым, медальым, шарнымашан пӧлекым кучыктымо.
20-22 апрельыште Пермьыште олимпиадын Юл кундем федеральный округысо йыжыҥже лиеш. Регионысо этапым иктешлен, тушко кундемна гыч каяш командым чумырат.