Марий Элысе школлаште тунемше 11 йоча – Junior национально-технологический олимпиадын сеҥышыже да призёржо-влак радамыште.
Ты олимпиаде «Россия – страна возможностей» президентский платформыш пура. Тений тушко элнан 69 регионжо гыч 24 тӱжем утла йоча ушнен. 5-7 класслаште тунемше 1320 ӱдыр-рвезе сеҥыше да призёр лӱмым сулен.
Команде дене таҥасымашыште финалист-шамычлан инженерный заданий-влакым шукташ кӱлын. Тыге нуно виртуальный реальностьын проектшым шотыш конденыт, искусственный интеллектым олаште пашам ышташ туныктеныт, компьютер дене модмашын прототипшым шочыктеныт, орбитыште улшо спутник-влакын кушто улмыштым шотлен луктыныт, робототехнике полшымо дене лӱдыкшыдымылык системым проектироватленыт да ушан устройствышто тӱрлӧ кушкылым кузе кушташ лиймым шымленыт.
Йошкар-Оласе Бауман лицейын «Двоичный код» командыже (А.Ефремова, И.Исупов, Д.Мухтасимова) «Технологий да виртуальный реальность» аланыште сеҥышыш лектын. Йошкар-Оласе 7-ше номеран школын да Бауман лицейын «Альфа» командыже (А.Кашкина, А.Магомедэминова) «Технологий да искусственный интеллект» аланыште икымше лийын. Козьмодемьянск оласе лицейын «Метеор» командыже (Д.Дмитриев) «Технологий да компьютер дене модмаш» аланыште чылам ончылтен. «Технологий да космос» сферыште Шернур район Марисола кыдалаш школын «Звёзды» командыже (А.Макаров) сеҥен, а Бауман лицейын «Искра» командыже (О.Мамаева) призёрыш лектын. «Технологий да робот-влак» аланыште Йошкар-Оласе 11-ше лицейын, Бауман лицейын, Медведево посёлкысо гимназийын «Инженеры» командыже (Н.Бакланов, Л.Григорьев, А.Капитанов) сеҥеныт.
Национально-технологический олимпиадыш ушнаш шонышо ӱдыр-рвезе-шамыч кажне ийын шукемыт, регион-влакат эреак ешаралтыт. Олимпиадыш ушнен, тунемше-шамычлан моштымашыштым да уш-акылыштым пеҥгыдемдаш йӧн пуалтеш. Сеҥыше да призёр-влакым диплом дене палемдат. Тидыже нунын портфолиоштым кумдаҥдаш сайын полша. Тыгак нунын лӱмыштым кугыжаныш информационный ресурсыш пуртат, ончыкыжым нуно президентский платформын моло проект дене конкурсышкыжо ушнен кертыт. Кажне аланыште ойыртемалтше куд эн сай командым юниор-влакын эртаралтше слётышкышт ӱжыт. Тудо декабрьыште Моско областьыште лиеш.