11 мартыште Юл кундем федеральный округын «Мо? Кушто? Кунам?» интеллектуальный олимпиадын регионысо йыжыҥжылан стартым пуымо. Тушто Марий Элысе студент-влакын кандаш командыже таҥасен. Тыгак ӱдыр-рвезе-влак икмыняр прогамме почеш уш-акылыштым тергеныт.
Икымше верыште Марий кугыжаныш университетын «Лига Леща», кокымшышо Политехын «Игнат Прайм», кумшышто ты вузынак «Бенедикт КамБерБетч» командышт лектын.
12 мартыште «Робототехника» программе почеш ӱдыр-рвезе-влак теорий да практике дене заданий-влакым шуктеныт. Ончылно ПГТУ-н студенткыже-влак К.Коптелова ден М.Максимова улыт. Кокымшо верыште – К.Иванов ден А.Тоцкая (ПГТУ), кумшышто – К.Васильев ден Д.Иванов (ПГТУ пеленысе механике да машиностроений институтын аграрный колледжше).
26-27 апрельыште Саранскыште олимпиадын финалже лиеш. Регионысо йыжыҥыште сеҥыше-влак Марий Элын чапшым тушто аралат.