10 январь гыч 9-11-ше класслаште тунемше-влаклан Российысе олимпиадын регионысо йыжыҥже тӱҥалын. Тудо 22 февраль марте шуйна. Кундемыштына школьник-влак 21 предмет дене шке уш-акылыштым тергат. Кажне олимпиадым эрдене 9 шагатлан эртараш палемдыме.
Олимпиадым 12 январьыште Марий кугыжаныш университетыште официально почыныт. Тушто Марий Элысе образований да науко министр Л.Ревуцкая лийын. Ты кечын тунемше-влак искусство дене олимпиадыш ушненыт, а икымше кечын йӱла почеш француз йылме дене уш-акылыштым тергеныт.
Регионысо йыжыҥыш 9-11-ше класслаште тунемше тӱжем утла еҥ ушнаш кумылым ончыктен. Тылеч посна 7-8 класслаште тунемше-влаклан физике дене Дж.К.Максвелл лӱмеш да математике дене Л.Эйлер лӱмеш олимпиаде-влак эртат.