Салам лийже, «Кугарня» газетым лудшо йолташ-влак! Кажне гана «Ӱшанем… Вучем…», «Ой, йӧратымаш», «Илыш йыжыҥ» лаштык-влакым куанен лудам. Мыят таче тыланда ик илыш историйым каласкалынем.
Ольош – ешыште кокымшо икшыве лийын. Ошалге чурийвылышан, волгыдо шинчан, вожылшырак рвезе. Армий деч вара стройкыш пашаш пурыш. Туштак Ларисам вашлие. Коклаштышт йӧратымаш тул вучыдымын ылыже. Лариса – оласе ӱдырамаш, кок шочшан ава. Ик жап олаште илышт, вара Ольош тудым ача-ава суртыш конден пуртыш. Аваже кок шочшан ӱдырамашлан ыш куане.
– Эргым, олаште ӱдыр кодын огыл мо? Молан самырык илышетым локтылат? Мый тудым марлан налашет ом пу! – манын вурседыле.
– Ме вашла йӧратена. Когыньнам иктат ойырлен огеш сеҥе. Тетла тыге ит ойло, – лие вашмут.
Оласе ӱдырамашлан ялыште илаш неле лийын. Вӱдымат пуртыман, коҥгашкат олтыман, вольыкымат ончаш полшыман. Ава лийшыже Ларисам эре туныктен, нимом ыштен от мошто манын шӱрдылын. Но ӱдырамаш чыла чытен, йӱдым гына чон лушкымеш шортын. Ик теле кечын Ольошын аваже ийыште яклешт камвозо. Кужу жап эмлымверыште кийыш. Сурт сомылка тӱрыснек Лариса ӱмбак возо. Варажым ава лийшым аза семын ончашат тудланак вереште. Неле манын ик ганат Ольошлан вуйым шийын огыл, чыла пашам шот дене ыштен. Тыге кок ий шиждымын эртен. Лариса ден Ольошын ӱдырышт шочын. Тунам ава лийше эргыж ден шешкыжлан мужыраҥаш кӱлмӧ нерген пеҥгыдын каласен. Вес кечынак Ольош ден Лариса загсыш каен возалтыныт. Илыш шке радамже дене умбакыже каен. Ик жап гыч пиалан мужыр у суртым нӧлтен шынден. Ала-кунам ялысе пашам ыштен моштыдымо ӱдыр сай озавате, пелаш, шешке лийын шинчын. Лариса – мыйын авам. Ачам дене пырля нуно ынде нылле ий пырля илат. Кызытат икте-весышт дене моткоч лыжган, шыман мутланат. Нуным ончен куанем, кугешнем.
АНЖЕЛА.
У Торъял район.